اسلام اباد (کوبها نیوز)- د افغانستان په چارو کې د پاکستان ځانګړی استازی اصف درانی وایي، اسلام اباد شواهد لري چې تحریک طالبان پاکستان (ټي ټي پي) له هند څخه د افغان منځګړو له لارې مالي مرستې ترلاسه کوي.
د پاکستان د سولې او امنیت مطالعاتو انسټیټیوټ (PIPS) له خوا د “افغانستان سوله او پخلاینه: د پاکستان ګټې او سیاسي انتخابونه” په نوم جوړ شوي سمپوزیم ته په وینا کې دراني اټکل وکړ چې د تحریک طالبان له پنځو زرو څخه تر شپږ زرو پورې وسله وال له پاکستان نه افغانستلن ته کډوال شوي چې د کورنیو ړ غړو په ګډون یې ټولټال شمېر ۷۰ زرو ته رسېږي.
دراني وویل چې له تحریک طالبان پاکستان سره د پاکستان د سولې خبرې لا دمخه ناکامې شوې وې ځکه دې ډلې نه غوښتل تسلیم شي او یا د پاکستان اساسي قانون ته غاړه کیږدي. هغه په ډاګه کړه، چې دې ډلې ته نورې کړۍ امکانات برابروي، ځکه د ‘افغانستان موقت’ حکومت د دې لویې ډلې ورځني لګښتونه نه شي پوره کولای.
سربیره پردې، هغه وویل چې تحریک طالبان پاکستان په پیښور کې د عامه پوځي ښوونځي (APS) برید په ګډون د خپلو بریدونو په تړاو له قانوني پایلو سره مخ کیدو نه انکار کړی.
دراني ټینګار وکړ: “د خبرو اترو په ترڅ کې، پاکستان د کابل له موقت حکومت څخه وغوښتل چې د تحریک طالبان پاکستان د مشرانو د تسلیمۍ، بې وسلې کولو او نیولو ضمانت ورکړي او تحریک طالبان پاکستان د پاکستان د “سرې کرښې” په توګه طبقه بندي کړي. “
پاکستان له ۲۰۱۴ کال راهیسې په بېلابېلو پړاوونو کې له تحریک طالبان پاکستان سره د سولې خبرې ترسره کړې خو تحریک طالبان پاکستان ادعا کوي چې اسلام اباد له دغو خبرو نه د نفوذ او د دوی ترمنځ د اختلافاتو د رامنځته کولو په برخه کې ناوړه ګټه پورته کوي.
د پاکستان استازي د ډیورنډ کرښې د اغزن تار د غځولو په اړه د پوښتنې په ځواب کې له افغانستان سره د ډیورنډ فرضي کرښې په ټولو غاړو کې د یوه ‘متحد سند سیستم ‘ پر پلي کېدو ټینګار وکړ.
دغه سمپوزیم د پاکستان نورو سیاسي شخصیتونو او شنونکو ته هم یو پلیټ فارم برابر کړ چې په افغانستان کې د پاکستان د پالیسۍ او د سیمې پر ثبات د هغې د اغیزو په اړه خپل نظرونه وړاندې کړي.
د سیاسي چارو کارپوه او د پاکستان پخواني سناتور افراسیاب خټک له اسلام اباده وغوښتل چې د افغانستان په اړه خپله تګلاره له سره و ارزوي. هغه د پاکستان ډیری داخلي ننګونې د افغانستان په اړه د د اسلام اباد د تاریخي چلند پایله ګڼي.
د دراني دا ادعاوې په داسې وخت کې مخې ته راځي چې پاکستاني طالبان د پاکستان پوځ او امنیتي ادارې د قبایلي سیمو په اشغال تورنوي او ټینګار کوي چې د دوی د جګړې هدف د بهرنیو مرستو له انحصار پرته د اسلامي شریعت نافذول او د خپلې ازادۍ اعاده کول دي.