کابل (کوبها نیوز): د افغانستان د کرکټ بورډ د غوراوي کمېټې د سریلانکا پر وړاندې د راتلونکو دریو شل اوریزو لوبو لپاره د افغانستان د کرکټ ملي لوبډله اعلان کړه.
ټاکل شوې دغه سیریز د فبرورۍ له ۱۷مې نیټې څخه تر ۲۱مې نیټې پورې په رنګیري ډمبولا نړیوال کرکټ لوبغالي کې ترسره شي.
د افغانستان د T20I لوبډلمشر راشد خان به په داسې حال کې په لوبډله کې نه وي، چې د ملا له وروستیو جراحي عملیاتو څخه د رغیدو دمه کوي. د هغه نشتوالي د ابراهیم ځدراڼ لپاره لاره هواره کړې چې په متحده عربي اماراتو او هند کې په تیرو دوه شل اوریزو لوبو کې یې د ټیم مشري کړې وه او دا ځل بیا د سریلانکا پروړاندې د ټیم مشري کړي.
بل مهم لوبغاړی مجیب الرحمن هم د سریلانکا پر وړاندې د یو ورځنیو لوبو لړۍ له پیل مخکې د لاس د ټپ له امله له لوبډلې نه لرې پاتې دی. تېز توپ اچوونکی محمد سلیم صافی چې د هند په سفر کې یې له افغان لوبډلې سره مرسته کړې وه، خو د هیمسټرینګ د فشار له امله له لوبډلې وتلی و، د غیر حاضرو کسانو په لېست کې شامل شوی. د هغه پر ځای وفادار مومند د سریلانکا پر وړاندې د لوبډلې د پیاوړتیا لپاره رابلل شوی.
د کریکټ بورډ د غراوي کمیټې مسوول احمد شاه سلیمان خیل وايي: “موږ په راتلونکي T20 نړیوال جام باندې ډیر تمرکز کوو او هدف مو د لوبغاړو یو قوي ترکیب دی چې تجربه لرونکي او نوي راغلي لوبغاړي پکې شامل دي. دا لړۍ، د مارچ په میاشت کې د ایرلینډ په وړاندې د راتلونکو دریو T20 لوبو سره، موږ ته د ارزونې لپاره یو ښه فرصت برابروي.”
د کرکټ بورډ اجرایوي رییس نصیب خان وايي: «موږ په لوړه کچه د خپلو نویو کرکټرانو د مهارتونو د لوړولو لپاره د کافي فرصتونو د برابرولو په برخه کې پر خپلې ژمنې ټینګ پاتې یو. د پیاوړې سکواډ جوړول زموږ لپاره لومړیتوب دی، دا ډاډه کول چې موږ د اړتیا په وخت کې د خپلو کلیدي لوبغاړو لپاره د باور وړ ملاتړ ولرو. هغه رول ته ورته چې قیس احمد یې اوس د راشد خان په نشتواليکې لوبوي».
د سریلانکا پر وړاندې د درې شل اوریزو لوبلړۍ لپاره د افغانستان په لوبډله کې ابراهیم ځدراڼ (کپتان)، رحمان الله ګوربز (ویکټ ساتونکی)، محمد اسحاق رحیمي (ویکټ ساتونکی)، حضرت الله ځاځی، ګلبدین نایب، محمد نبي، نجیب الله ځدراڼ، عظمت الله عمرزی، کریم جنت، شرف الدین اشرف، فضل حق فاروقي، فرید احمد، نوین الحق، نور احمد، وفادار مومند او قیس احمد شامل دي.
د سریز پلان
| لوبځای | لویه | نېټه |
| رنګیري ډمبولا نړیوال کرکټ لوبغالی | د نړیوال شل اوریز جام لومړۍ لوبه | ۱۷ فبروري، ۲۰۲۴ |
| رنګیري ډمبولا نړیوال کرکټ لوبغالی | د نړیوال شل اوریز جام دویمه لوبه | ۱۹ فبروري، ۲۰۲۴ |
| رنګیري ډمبولا نړیوال کرکټ لوبغالی | د نړیوال شل اوریز جام درېیمه لوبه | ۲۱ فبروري، ۲۰۲۴ |