کابل: ( ۱۳ کب ۱۴۰۲ )- د طالبانو استخباراتو د ثناءالاسلام په نوم یو هندی وګړی له داعش سره د همکارۍ په تور نیولی دی.
دغه هندی وګړی د هند د کیرلا ایالت اوسېدونکی دی چې له داعش سره د یوځای کېدو لپاره د تاجکستان له لارې افغانستان ته تللی و.
هندو پوست ورځپاڼې دا هندی وګړی مشکوک تروریست یاد کړی او د هغه عکس يې هم خپور کړی دی.
په رپوټ کې نه دي ویل شوي چې دا هندی وګړی د افغانستان په کوم ولایت کې نېول شوی، خو يادونه شوې چې د طالبانو حکومت د استخباراتو له څېړنو وروسته، نوموړی په کندهار ولایت کې بندي شوی.
د طالبانو حکومت تراوسه په دې تړاو رسنیو ته څه نه دي ويلي.
په ورته وخت کې د هند OPINDIA په دې تړاو په یوه رپوټ کې ویلي: “په افغانستان کې د طالبانو حکومت د هندي وګړي د نېول کېدو په تړاو د هند ته خبر ورکړی. د دواړو هېوادونو ترمنځ د نورو ګامونو د پورته کولو په اړه خبرې روانې دي.”
یادې رسنۍ دا هم ويلي چې، نوموړی هندي وګړی، کندهار ولایت ته په لاره لومړی د پولیسو له خوا نېول شوی او تر ابتدايي تحقیقاتو وروسته د طالبانو استخباراتو ته سپارل شوی دی.
تر دې مخکې هم په افغانستان کې د داعش په لیکو کې د هندي وګړو د نېول کېدو او وژل کېدو رپوټونه خپاره شوي دي.