کابل (کوبهانیوز) – د افغانستان لپاره د امريکا د بهرنيو چارو وزارت ځانګړي استازي، توماس ويست په خپل ایکس پاڼه کې ليکلي، چې امريکا په باميانو کې د وسله وال بريد له امله چې افغانانو او بهرنيو اتباعو ته يې مرګ ژوبله واړوله، خواشيني ده.
ویست وویل چې تاوتریخوالی د اوسنی وضعیت ځواب نه دی.
اروپايي ټولنې هم د يوې اعلاميې په خپرولو سره په باميانو کې د بهرنيو سيلانيانو پر يوې ډلې وسله وال بريد غندلى دى.
د اروپايي ټولنې او امريکا په اعلاميو کې د هغو بهرنيو سيلانيانو هويت نه دی په ډاګه شوی چې د جمعې ورځې په بريد کې وژل شوي او ټپیان دي.
د طالبانو د حکومت د کورنیو چارو وزارت تایید کړي چې د جمعې په ماښام شاوخوا شپږ بجې د بامیانو په ښار کې په وسله وال برید کې څلور بهرني اتباع وژل شوي او د یوه افغان په ګډون څلور بهرني اتباع ټپیان شوي دي.
د طالبانو د حکومت د کورنیو چارو وزارت په دغه برید کې د وژل شویو بهرنیو سیلانیانو هویت نه دی په ډاګه کړی، خو ځايي خبریالانو په لومړیو ساعتونو کې خبر ورکړی و، چې په برید کې وژل شوي سیلانیان امریکايي اتباع وو.
د پېښې په ځای کې امنیتي سرچینو بیا وروسته تایید کړه چې په دغه وسلوال برید کې چې په تونس موټر کې د سپرو وسلوالو لخوا وشو، وژل شوي ټول څلور بهرني سیلانیان هسپانوي اتباع دي.
خو په دغه برید کې په ټپي شویو بهرنیو سیلانیانو کې یو اسټرالیايي ګرځندوی، یو د ناروې تبعه، یو د لیتوانیا تبعه او یو هسپانوی سیلانی شامل دي.
په دې وسله وال بريد کې د دغو سيلانيانو يو افغان ژباړونکى هم ووژل شو او شپږ تنه لاس پلورونکی چې د باميانو په ښار کې د خوراکی توکو په پلورلو بوخت و، ووژل شول.
تر اوسه کومې ډلې د دې برید مسوولیت نه دی منلی.
د طالبانو د حکومت د کورنيو چارو وزارت وياند، عبدالمتين قانع وويل چې د دغه بريد په تور څلور تنه نيول شوي او د څېړنو لپاره د باميانو ولايت امنيه قوماندانۍ ته سپارل شوي دي.
په دې وروستيو مياشتو کې د افغانستان بېلابېلو ښارونو، په تېره بيا تاريخي او لرغونو ځايونو ته د بهرنيو سيلانيانو تګ زيات شوی دی.
په افغانستان کې واک ته د طالبانو له بیا ستنیدو وروسته، دا لومړی ځل دی چې پر بهرنیو سیلانیانو برید کیږي او پراخه مرګ ژوبله لري.
د طالبانو حکومت د اطلاعاتو او کلتور وزارت د روان کال د حمل په میاشت کې اعلان وکړ چې تیر کال څه دپاسه اته زره بهرنیو سیلانیانو افغانستان، او په ځانګړې توګه د دغه هیواد تاریخي او لرغونو سیمو ته سفر کړې وه، خو د پسرلي په رارسیدو سره افغانستان ته د سیلانیانو شمیر ته سفر ډیر شوی دی.