واشنګټن (کوبها نیوز) د امریکا د سنا مجلس دیموکراتو او جمهوري غوښتونکو غړو د یوه لایحې په چمتو کولو او د امریکا کانګرس ته د وړاندې کولو سره د هغو افغانانو لپاره چې د امریکا له پوځ او د بهرنیو چارو وزارت پروژې کې یې کار کړی، د کډوالی د ۲۰ زره ځانګړو ویزو (SIV) د تصویب غوښتنه کړې ده.
د ډیموکراټیک ګوند سناتورې جین شاهین په خپله ایکس پاڼه کې لیکلي چې “موږ باید له خپلو افغان متحدینو سره مرسته وکړو او خپلې ژمنې پوره کړو، د همدې هدف لپاره ما په ځانګړې کمېټه کې د لایحې په ترتیب او تصویب کې همکاري وکړه ترڅو د ۲۲ ویزو تایید تضمین شي.”
د امریکا د بهرنیو چارو وزارت تېره اوونۍ اعلان وکړ چې له دغه وزارت سره یوازې د کډوالۍ ۱۰۰۰ ځانګړې ویزې پاتې دي او کله چې دا ویزې پای ته ورسېدې، د امریکا زرګونه پخوانی افغان متحدین چې امریکا ته د تللو په تمه دي د طالبانو د حکومت له خوا د نیول کېدو له خطر سره مخامخ کیږی.
د امريکا د متحده ايالاتو د پرمختيايي ادارې (USAID) پخواني کارکوونکي شاهپور زمرک، چې له څلورو مياشتو راهيسې په پاکستان کې دى، کوبها نيوز ته وويل، چې ده ته هم ویل شوی چې ويزې ختمې شوې او بايد انتظار وباسي.
“دوه اونۍ وړاندې ما او زما د کورنۍ غړو روغتیايي معاینات وکړل او پاسپورتونه مو سفارت ته د ویزو د ترلاسه کولو لپاره وسپارل، خو تېره چهارشنبه په اسلام اباد کې د امریکا سفارت زموږ پاسپورټونه بېرته راکړل او خبر یې راکړ چې د SIV ویزې ختمې شوې دي. او تر بلی خبرتیا پورې انتظار وکړئ.”
کانګرس ته د امریکایی سناتورانو دغه لیک، چې یوه کاپي یې اسوشیتید پریس خبري اژانس ته هم رسیدلې، په کې امریکايي سناتورانو د دغه هېواد له کانګرسه غوښتي، چې د روانې میلادي میاشتې تر ۲۲ مې پورې د ۲۰ زره ویزو غوښتنه تصویب کړي.
د امریکا د ملي امنیت شورا ویاند جان کربي هم د پنجشنبې په ورځ په یوه خبري کنفرانس کې وویل چې، د ولسمشر بایډن اداره هم د مهاجرت د ځانګړو ویزو د ختمیدو په اړه اندیښمنه ده.
“که څه هم په افغانستان کې زموږ جګړه پای ته رسېدلې، خو له افغانانو او هغو کسانو سره چې په دې جګړه کې یې له موږ سره همکاري کړې، زموږ ژمنه پای ته نه ده رسېدلې.”
افغانانو ته د کډوالۍ د ځانګړو ویزو د ورکولو پروګرام په ۲۰۰۹ کال کې پیل شو او تر دې دمه د امریکا د پوځ زرګونه ژباړونکی او د امریکا د بهرنیو چارو وزارت د پروژو کارکوونکي له خپلو کورنیو سره له همدغو ویزو په استفادې امریکا ته راغلي دي.
له کله چې د ۲۰۲۱ کال د اګست په میاشت کې متحده ایالات له افغانستان څخه ووتل او په افغانستان کې د پخوانیو امریکایی همکارانو ژوند په زیاتیدونکي ډول له ګواښ سره مخ شو، د ځانګړي مهاجرت ویزو لپاره غوښتنې زیاتې شوې.