واشنګټن (۱۹ کب ۱۴۰۴ کوبها نیوز) – د امربکا د سنټکام قوماندان جنرال مایکل ای. کوریلا خبرداری ورکړ چې په افغانستان کې داعش پورې تړلې ډلې کولای شي په راتلونکو شپږو میاشتو کې له مخکینۍ خبرتیا پرته د امریکا ګټې په نښه کړي.
د امریکا د مشرانو جرګې د وسله والو خدماتو کمیټې ته د ۲۰۲۵ مالي کال د دفاعي مجوز او د راتلونکو کلونو لپاره د دفاعي پلان په اړه د وینا پر مهال، جنرال کوریلا ټینګار وکړ چې داعش-خراسان د متحده ایالاتو د ګټو پر ضد د بریدونو د ترسره کولو وړتیا او اراده دواړه لري. هغه زیاته کړه: “داعش د روان کال په پیل کې په عراق او سوریه کې خپل بریدونه زیات کړل او له افغانستان څخه د برید خطر مخ په زیاتیدو دی. داعش -خراسان په لږ وخت کې د امریکا او لویدیځ پر ګټو د برید کولو وړتیا او اراده خوندي کړې او په شپږ میاشتو کې له کوم خبرداري پرته برید کولای شي”.
په افغانستان کې د امریکا د پوځ د څارنې ماموریت په اړه د یوې پوښتنې په ځواب کې، جنرال کوریلا وویل چې عراق، سوریې او یمن ته د سمندري ځواکونو او تجهیزاتو د ساتنې په هدف د استخباراتي او کشفي تاسیساتو لیږدولو ددوی ماموریت اغیزمن کړی.
سربیره پردې، جنرال کوریلا په سیمه کې د ورانکارو ډلو له فرصتونو نه د چین او روسیې د استفادې په تړاو خبرداری ورکړ او د تاو تریخوالي د کمولو لپاره یې د دوی د محدودو هڅو په اړه اندیښنه څرګنده کړه. هغه د نړۍ د انرژۍ رسولو او نړیوالې سوداګرۍ لپاره د سینټ کام پر حیاتي ارزښت ټینګار وکړ او د امریکا د امنیت او سوکالۍ په ساتلو کې یې ددې قوماندانۍ رول ستراتیژیک وباله.
سناتور فېشر د خپلو پوښتنو په ترڅ کې يادونه وکړه، چې د امريکا له وتلو راهيسې، په کابل کې يوازې يو هدفي بريد ترسره کړى، چې ايمن الظواهري پکې په نښه شوى. فيشر د باور وړ سيمه ييزو همکارانو د نشتوالي په اړه اندېښنه څرګنده کړه او ویې ویل، چې واشنګټن [دمګړۍ]یوازې د پاکستان هوايي حريم یې وکاروي.
جنرال مایکل کوریلا تېر کال هم ویلي و چې که داعش له افغانستان نه بهر پر امریکا او نورو لوېدیځو هېوادونو د بریدونو تمرکز وکړي، کولای شي په شپږو میاشتو کې دغه وړتیا ترلاسه کړي.