نيويارک (کوبها نیوز) – د ملګرو ملتونو د سرمنشي انتونیو ګوتریش له خوا د طالبانو تر واکمنۍ لاندې د افغانستان د وضعیت په اړه د مایوسوونکي راپور سره سره، دغه سازمان تمه لري چې د دوحې په درېیمه ناسته کې به د طالبانو له ګډون سره په دې هیواد کې شته ځینو ستونزو ته د حل لاره پیدا شي.
د ملګرو ملتونو د عمومي منشي استازې، روزا اوتونبایوا د جمعې په ورځ د افغانستان په اړه د ملګرو ملتونو د امنیت شورا په ځانګړې غونډه کې وویل، تمه لري چې طالبان د قطر ناستی ته یو لوړ پوړی پلاوی ورواستوي.
اغلې اوتونبایوا وویل: “موږ د طالبانو د دې پرېکړې هرکلی کوو چې د دوحې په ناسته کې ګډون کوی، خو دا د طالبانو په رسمیت پېژندلو په معنی نه ده، بلکې طالبان په رسمیت پېژندلو ته اوږده لاره لري، له نړۍ سره تعامل او کابل ته د دیپلوماتانو سفرونه د طالبانو دریځ نرم کړی او د دی سفرونو دوام به نور هم د هغوی موقف رانرم کړي او دا کار کولای شي وضعیت ښه کړي.”
ټاکل شوې چې د دوحې درېیمه غونډه راتلونکې اوونۍ د جون په ۳۰مه او د جولای په لومړۍ نېټه په قطر کې د دوو ورځو لپاره جوړه شي.
د دوحې د درېیمې ناستې د اجنډا په سر کې د اقتصادي وضعیت، د اقلیم بدلون او له نشهيي موادو سره د مبارزې په اړه بحثونه کېږي او د طالبانو ویاند ذبیح الله مجاهد هم ویلي، چې له یادی اجڼډا سره به دوی هم په دی ناسته کې ګډون وکړی.
د جمعې په ورځ د ملګرو ملتونو د امنیت شورا په غونډه کې د امریکا د متحدو ایالتونو د استازي مرستیال یو ځل بیا د افغانستان لپاره د ملګرو ملتونو د ځانګړي استازي د ټاکلو غوښتنه وکړه.
رابرټ ووډ وویل چې نړیواله ټولنه باید د افغانستان په اړه خپل مسوولیتونه ادا کړي او د ده په وینا دا مسوولیتونه داسې چوکاټ ته اړتیا لري چې د ملګرو ملتونو د ځانګړي استازي له خوا د افغانستان د وضعیت له ارزونې وروسته جوړ شي.
منیژه وافق، چې د امنیت شورا په غونډه کې یې د افغان ښځو د استازې په توګه خبرې کولې وویل: “طالبانو د افغانانو په ځانګړې توګه د افغان ښځو په وړاندې هیڅ انعطاف نه دی ښودلی، د طالبانو د واکمنۍ پر مهال د افغانستان اقتصادي وضعیت خراب شوی او د ښځو پر وړاندې د حتی طالبانو د ښځو معاشونه کم کړي دي.”
په دې ناسته کې په ملګرو ملتونو کې د افغانستان د استازولی سرپرست، نصیر احمد فایق له ملګرو ملتونو وغوښتل چې د دوحې غونډې کې د سیاسي جریانونو او افغان ښځو استازو ته د ګډون بلنه ورکړي.
ښاغلي فایق وویل، د افغانستان د مسئلې له سیاسي حل او افغانانو ته د رول ورکولو پرته د نړۍ غونډې د افغانستان ستونزه نه شي هوارولی.