واشنګټن (کوبها نیوز)- د بلوڅ ملي غورځنګ مشر ډاکټر نسیم بلوڅ په بلوچستان کې د داعش پر کمپونو اندېښنه ښودلې او وایي، د پاکستان پوځ یې حمایه کوي.
ډاکټر بلوچ د “پاکستان کې له بشري حقونو سرغړونې: بلوچستان په محراق کې” تر سرلیک لاندې د بلوڅو د بشري حقونو شورا یوې غونډې ته په وینا کې وویل: “په بلوچستان کې د نړیوال ترهګریز سازمان داعش کمپونه فعال دي او دوی د پاکستان د پوځ تر مستقیم څار او ملاتړ لاندې فعالیت کوي. دغه جنګیالۍ ډله له ژورو افراطي مذهبي عقایدو سره لاس او ګریوان ده او په بلوچستان کې له بشري حقونو په کلکه سرغړونې کوي”.
ډاکټر بلوچ د بلوچستان تاریخي شالید ته په اشارې، اووه لسیزې وړاندې پر بلوچستان د پاکستاني پوځ د برید یادونه وکړه او ویې ویل: ” ۷۶ کاله وړاندې د مارچ پر ۲۷ مه د پاکستان پوځ د بلوچستان په خاوره په زور یرغل وکړ، له هغه وخته راهیسې دا د یوې تورې ورځې په توګه پېژندل کیږي. پاکستان نړیوالو قوانینو ته په بې اعتنایي آزاد بلوچستان اشغال کړ او زموږ د خپلواکۍ خوبونه یې عملي کېدو ته پرېنښودل”.
ډاکټر بلوچ د بلوچستان او ددې سیمې د خلکو په ستراتیژیک ارزښت او سیکولر ارزښتونو ټینګار وکړ او د سیمه ییز ثبات په وده کې یې د ارزښتناکو شریکانو په توګه د دوی وړتیا په ګوته کړه. ده وویل، چې آزاد بلوچستان د سيمې په امن او يووالي كې مرستندوی تمامیږي”.
دا څرګندونې په داسې حال کې کېږي، چې د طالبانو حکومت د کندهار د ځانمرګي برید عامل یو تاجیکستانی وګړی بولي او وایي، د پاکستان له بلوچستان نه افغانستان ته راغلی و او په کندهار کې یې د کابل بانک پر وړاندې ځان والوزاوه.