واشنګټن (کوبها نیوز) – د سه شنبې په ورځ (د مارچ ۱۹مه) د امریکا د پوځ پخوانی لوی درستیز جنرال مارک میلي او د امریکا د مرکزي قوماندانۍ پخوانی قوماندان جنرال کینټ مکینزي له افغانستان نه د امریکايي ځواکونو د وتلو په تړاو د امریکا د مشرانو جرګې د بهرنیو اړیکو کمیټې استماعیه غونډې ته حاضر شول.
په افغانستان کې د امریکا د سیاسي او پوځي ماموریت د پای ته رسیدو په اړه د امریکا پخواني لوی درستیز جنرال مارک میلي وویل چې له افغانستان نه وتل یوه سیاسي پریکړه وه او امریکايي پوځیانو هیڅکله د ډونالډ ټرمپ او جو بایډن ادارې ته دا ډول وړاندیز نه دی کړی.
جنرال میلي امریکايي سناتورانو ته وویل، چې طالبانو د دوحې تړون نه دی عملي کړی او لا هم ددوی پر ژمنو باور نه لري: “زه باور لرم چې طالبان لا هم یو ترهګر سازمان دی، هغوی لا هم په خپل هېواد کې وحشتناک کارونه کوي. زه افغانستان ته بیا ستنېدل په ګټه نه ګڼم او زه له طالبانو سره تعامل ستونزمن بولم”.
دغه دوه امریکايي جنرالان وايي، د افغان حکومت د بقا او د افغان ځواکونو د ملاتړ لپاره یې وړاندیز کړی و، چې ۲۵۰۰ امریکايي سرتېري په افغانستان کې پاتې شي، خو امریکايي حکومت له افغانستان نه د وتلو په پرېکړې سره یوه ستراتیژیکه تېروتنه وکړه.
د امریکا د مرکزي قوماندانۍ پخواني قوماندان جنرال کینټ مکینزي وویل، چې په اوسني وضعیت کې طالبان د امریکا لپاره ګواښ نه دي، خو نورو ډلو ته د دې فرصت برابروي، چې امریکا ته ګواښ متوجه کړي. خپله طالبان زموږ پر هېواد د برید اراده نه لري، خو هغوی نورو ډلو ته د ټوپ اچونې تختې په توګه ددې زمینه برابروي. زموږ اصلي اندیښنه باید دا وي چې داعش او القاعده په افغانستان کې د بیا منسجم کیدو فرصت لري او دوی زموږ پر هیواد د برید کولو تمه لري.»
په افغانستان کې د القاعدې او داعش د بیا منسجم کېدو په تړاو د امریکا د دغو دوو پخوانیو پوځي چارواکو ټینګار په داسې حال کې دی چې د طالبانو د حکومت ویاند ذبیح الله مجاهد تر دې وړاندې ډاډ ورکړی چې د القاعدې جنګیالي په افغانستان کې نشته او د داعش -خراسان څانګه ځپل شوې ده.
په امریکا کې د ولسمشریزو ټاکنو وخت په نږدې کیدو سره افغانستان یو ځل بیا په دغه هیواد کې توده موضوع ګرځیدلې او د دغه هیواد په کانګرس کې جمهوري غوښتونکي هڅه کوي استماعیه غونډو ته د پخوانیو چارواکو د رابللو له لارې د جوبایډن پر حکومت د نیوکو څپې لاپسې زیاتې کړي.