اسلام اباد (کوبها نیوز) – د سعودي عربستان د بهرنیو چارو د وزیر شهزاده فیصل بن فرحان بن عبدالله په مشرۍ د ریاض یو لوړ پوړی پلاوی د پاکستان په دوه ورځني سفر بوخت دی.
د بهرنیو مېلمنو له اوږده غیابت وروسته، پاکستاني چارواکو اسلام اباد کې د سعودي عربستان د بهرنیو چارو وزیر ته د سرې غالۍ په هوارولو او د ګلونو په ګیډیو هرکلی ووایه.
د سعودي د پلاوي له راتګ مخکې اسلام اباد د زینبیون ډله چې ویل کیږي د ایران له خوا یې ملاتړ کیږي د ترهګرو سازمانونو په لیست کې شامله کړه. سربیره پردې، پاکستاني چارواکو اشرف حسین نیولی، چې ګومان کیږي د دې ډلې د استخدام په هڅو کې مهم کس دی.
په یوه بل امنیتي اقدام کې، د کراچۍ پولیسو ددغه ښار هوايي ډګر کې له عراق څخه شاوخوا ۲۰۰ ستانه شوي شیعه پاکستانیان ونیول، څو ریاض ته په اړیکو کې خپله ژمنتیا او صداقت وښیي.
د سعودي د پلاوي د سفر اصلي موخه د پاکستان د لومړي وزیر شهباز شریف او ولیعهد محمد بن سلمان ترمنځ په مکه مکرمه کې د وروستۍ ناستې پر مهال د شوې هوکړې د عملي کېدو چټکول دي.
د مکې له غونډې وروسته، دواړو لوریو د پنځه میلیارد ډالرو پانګونې د عملي ګامونو اخستو ته، چې مخکې پرې بحث شوی، لیوالتیا ښودلې. ریاض تراوسه په رسمي ډول د پانګونې شرایط او څرنګتیا نه دي په ډاګه کړي.
پاکستان، چې د بهرنیو پانګونو ډېرولو او د اقتصادي ودې هڅولو ته لیواله دی، دا پانګونه د خپل بد اقتصادي وضعیت د سمولو لپاره حیاتي ګڼي. په داسې حال کې چې پر اسلام اباد بهرني پورونه زیاتیږي، دغه هیواد هڅه کوي د پانګونې د جلب له لارې په نړیوالو مالي موسسو باندې تکیه کمه کړي او د ځانګړې پانګونې اسانتیا شورا (SIFC) په څېر نوښتونو له لارې خپلې اقتصادي ننګونې کمې کړي. پاکستان د SIFC له لارې هیله من دی چې په راتلونکو دریو تر پنځو کلونو کې له خلیج هیوادونو ۷۰ میلیارد ډالره پانګونه جلب کړي.
د اقتصادي فرصتونو سره سره، کارپوهان خبرداری ورکوي چې د پاکستان کړکېچن سیاسي او امنیتي وضعیت، په ځانګړې توګه په بلوچستان او خیبر پښتونخوا کې د بهرنۍ پانګونې د راجلبولو لپاره یوه ستره ننګونه ده.