ریاض (کوبها نیوز) د شنبې په ورځ د ذوالحجې په نهمه نیټه یو میلیون او ۸۳ زره حاجیان د عرفات په غوڼډې کې د عرفات په مراسمو کې ګډون وکړ او د حج د مراسمو دغه برخه یې ترسره کړه او نن سهار د حج د فریضې ادا کولو لپاره منا ته روان شول.
په داسې حال کې چې په سعودي عربستان کې د سږ کال د حج د مراسمو پر مهال د هوا تودوخه ۴۰ درجې سانتي ګراد ده، سعودي عربستان د عرفات د مراسمو ځای ته د حاجیانو د لېږدولو لپاره مېټرو سیستم هم فعال کړی او ۷۲ زره بسونه یې چمتو کړي.
په داسې حال کې چې د رفح د لارې د بندیدو له امله د غزې اوسیدونکي سږ کال حج ته نه دي تللي، د سعودي عربستان حکومت اعلان وکړ چې په غزه کې د وژل شویو فلسطینیانو د کورنیو ۱۰۰۰ غړي یې د حج د ادا کولو لپاره دغه هیواد ته لیږدولي دي.
د طالبانو د حکومت ویاند، ذبیح الله مجاهد اعلان وکړ چې د تیرو کلونو خلاف به سږ کال افغانستان د عرفې او د لوی اختر لومړۍ ورځ د سعودي عربستان خلاف نمانځی، سبا یکشنبه به په افغانستان کې عرفه او دوشنبه د لویی اختر لومړې ورځ وی.
دا په داسې حال کې ده چې د طالبانو حکومت د ریاست الوزرا د سیاسي مرستیال، مولوي عبدالکبیر په ګډون، د کورنیو چارو، حج او اوقافو، اطلاعاتو او فرهنګ وزیران او د استخباراتو اداری رئیس او ګڼ شمېر ادارو د رئیسانو په ګډون د دوی د حکومت لوړپوړو چارواکی په عربستان کې دی او د شنبی ورځ یی د عرفی مراسم ترسره کړل او یکشنبه به د لویی اختر د لومړی ورځی مراسم ترسره کوی.
د افغان زيارت کوونکو له ډلې څخه شهسوار کوبها نيوز ته وويل چې د تېرو کلونو په پرتله سږ کال افغان حاجيان له زياتو ستونزو سره مخ دي.
د هغه په وينا، د افغان حاجيانو د اوسېدو ځاى له هغو ځايونو لرې دى، چیرته چې د حج مراسم تر سره کېږي او له دې امله چې ډېرى افغان حاجيان د پاخه عمر لرونکي دي، نو دوى نه شي کولى چې په مراسمو کې په خپل وخت ګډون وکړي.
سږ کال د حج د مراسمو ترسره کولو ته له افغانستان څخه په ۹۴ الوتنو کې ۳۰ زره حاجیان سعودي عربستان ته لېږدول شوي او پر دوی سربېره، د نړۍ له بېلابېلو هېوادونو څخه زرګونه نور افغانان هم دغو مراسمو ته تللي دي.