د طالبانو د استخباراتو ریاست او د امر بالمعروف او نهی عن المنکر وزارت په ۱۴۰۲ کال کې د خبریالانو په نیولو، ګواښنې او وېرولو سره په مستقیم او غیر مستقیم ډول د رسنیو او د بیان د ازادۍ د تر پښو لاندې کولو مسوولیت پرغاړه درلود.
کابل (کوبها نیوز): د افغانستان د خبريالانو مرکز په ۱۴۰۲ کال کې د افغان رسنيو او خبريالانو د ازادۍ وضعیت اندېښمنوونکی بللی.
دغه مرکز د خبریال ملي ورځې په تړاو خپل کلني راپور کې ویلي چې په افغانستان کې په ۱۴۰۲ کال کې رسنۍ او خبریالان د خپلو اساسي او قانوني حقونو د ازادۍ په برخه کې له سختو محدودیتونو سره مخ شوې او حقونه یې په پراخه کچه تر پښو لاندې شوي دي.
د افغان خبريالانو د مرکز په کلني راپور کې ويل شوي چې په تېرو ۱۲ مياشتو کې پر رسنيو او خبريالانو فشارونه او ګواښونه د تېر کال په پرتله په ډېر شدت سره دوام لري.
“په ۱۴۰۲ کال کې د رسنیو او خبریالانو له حقونو څخه د سرغړونې لږ تر لږه ۱۳۹ پېښې ثبت شوې، چې په دې کې ۸۰ د ګواښونو او ۵۹ د خبریالانو د نیولو دي، په ۱۴۰۱ کال کې د خبریالانو او رسنیو له حقونو د سرغړونې ۲۳۷ پېښې ثبت شوې دي. “
د افغانستان د خبریالانو مرکز وايي، په تېرو ۱۲ میاشتو کې پر خبریالانو کوم هدفي برید نه دی شوی او د هغوی د وژل کېدو او ټپي کېدو پېښې نه دي رپوټ شوې چې دا په خپل ذات کې یو مثبت او هیله بښونکی پرمختګ دی.
د دغه راپور موندنې ښيي چې د طالبانو د استخباراتو ریاست او د امر بالمعروف او نهی عن المنکر وزارت په ۱۴۰۲ کال کې د خبریالانو په نیولو، ګواښنې او وېرولو سره په مستقیم او غیر مستقیم ډول د رسنیو او د بیان د ازادۍ د تر پښو لاندې کولو مسوولیت پرغاړه درلود.