اسلام اباد (کوبهانیوز) – د افغانستان لپاره د پاکستان ځانګړي استازي د چهارشنبې په ورځ د اسلام اباد د ستراتیژیکو مطالعاتو په انسټیټیوټ (ISSI) کې د وینا پر مهال وویل، چې په افغانستان کې د طالبانو د واکمنۍ له پیل راهیسې په قبایلي سیمو کې پر پاکستاني ځواکونو بریدونه ۶۵ سلنه زیات شوي دي.
اصف درانی ادعا کوي چې په تېرو څلورو لسیزو کې د افغانستان وضعیت د پاکستان پر وضعیت د اسلام اباد او ډهلي تر منځ د درېیو جګړو په پرتله ډېر ویجاړونکي اغېزې لرلې او ویلي یې دي چې په افغانستان کې د طالبانو د اوسني واکمنۍ په وروستیو دوو کلونو کې په پاکستان کې ځانمرګي بریدونه د پخوا په پرتله پنځه سوه ځله ډېر شوي دي.
درانی وايي، پاکستان تمه درلوده، چې په افغانستان کې د طالبانو له واک ته رسېدو وروسته به په سیمه کې امنیتي وضعیت ښه شي، خو اوس وضعیت لا بد شوی او په پاکستان کې بریدونه ډېر شوي دي.
د افغانستان لپاره د پاکستان ځانګړي استازي په دې کتنه کې ژمنه وکړه چې اسلام اباد به هڅه وکړي چې شته ستونزې په ځانګړې توګه د پاکستاني طالبانو (ټي ټي پي) مسله له طالبانو سره د ډیپلوماتیکو لارو هواره کړي.
د درانی دا نوې ادعا په داسې حال کې ده چې د طالبانو د حکومت ویاند ذبیح الله مجاهد وړاندی له دی د پاکستاني چارواکو د ورته ادعا په ځواب کې ویلي وو چې د دوی حکومت به اجازه ورنکړي چې د افغانستان خاوره د نړۍ امنیت ته ګواښ او د ګاونډیو هېوادونو د ناامنۍ لپاره وکارول شي.
د طالبانو د حکومت ویاند له دې مخکې هم پاکستان په دې تورن کړی و چې د خپلو کورنیو ستونزو په حل کې پاتې راغلی او ویلي یې وو: “دا ډول څرګندونې له مسوولیت څخه د ځان د خلاصون او د خپلو ستونزو د توجیه کولو په معنا دي، تحریک طالبان پاکستان شل کاله وړاندې هلته فعال و او دا دا د پاکستان داخلي ستونزه ده.”
د افغانستان له ادرس څخه د امنیتي ستونزو په اړه د پاکستاني په هغه ګډه اعلامیه کې هم راغلی ده چې پاکستان ته د ایران د ولسمشر د سفر په پای کې خپره شوه.
په دغه اعلامیه کې د پاکستاني ادرسه غوښتل شوي، چې ایران او پاکستان به له افغانستانه را ولاړې شوې امنیتي ستونزې په ګډه هوارې کړي.
خو ایران په دې اړه کومه اندېښنه نه ده څرګنده کړې او ایراني چارواکو له دې وړاندې هم ویلي چې دوی داسې نښې نه دي ترلاسه کړي چې وښیې په دغه هېواد کې د وروستیو بریدونو عاملین دی په افغانستان کې له کومی ډلی سره اړیکې ولري.
دوه میاشتې وړاندې په کرمان شهر کې د ایران د انقلاب ساتونکی ځواک (سپاه پاسداران) د قومندان قاسم سلیماني د تلین په مراسمو له برید وروسته دغه هېواد د جیش العدل ډله تورونه کړه او ادعا یې وکړه چې دغه ډله په پاکستان کې خوندي ځالې لري او له هغه ځایه د ایران په خاوره کې بریدونه کوی.