واشنګټن (۱۴ حوت ۱۴۰۲: کوبها نیوز) د افغانستان متحده جبهه ادعا کوي چې د دې جبهې د رهبرۍ غړي هڅه کوي د پخواني حکومت د وسله والو ځواکونو لیکې د دوی په وینا، «د طالبانو له کنټرول نه د افغانستان د آزادولو» لپاره بېرته منسجمې کړي.
په امریکا کې مېشتو د افغانستان متحدې جبهې غړو چې د یکشنبې په ورځ یې په واشنګټن کې د دې جبهې په دفتر کې د سرتېرو د ورځې د نمانځنې په مناسبت جوړې شوې غونډې ته خبرې کولې، د افغانستان اوسنی وضعیت د اندېښنې وړ وباله او د طالبانو حکومت یې د افغانانو د حقونو په تر پښو لاندې کولو تورن کړ.
د افغانستان د متحدې جبهې غړي او په جمهوري نظام کې د هرات والي عبدالقیوم رحیمي د جمهوري نظام د مشرانو په کړنو نیوکه وکړه او ویې ویل، سره له دې چې د دوحې د سولې د هوکړې په ماهیت پوهېدل، خو پر وړاندې یې ونه درېدل او دغه تړون د نظام د سقوط لامل شو. قیومي ادعا کوي چې تر ۲۰ زره ډېر کسان چې ډېری یې د پخواني نظام سرتېري دي، نیول شوي او دا مهال د طالبانو په زندانونو کې بندیان دي.
هغه زیاته کړه: “زموږ د معلوماتو له مخې، د طالبانو له خوا زموږ ٢٧-٢٨ زره همسنګره ملګري بنديان دي، موږ به يې هېر نه کړو ، بېرته را ګرځو، خپل وطن به ازاد کړو او د افغانستان د خلکو حقونه به تامين کړو.”
د افغانستان د متحدې جبهې یوه بل غړي جنرال خوشحال سادات په دې مراسمو کې وویل چې د دوی د جبهې د رهبرۍ غړي هڅه کوي چې د جمهوري نظام سرتېري له هېواده بهر بېرته منسجم کړي.
جنرال سادات پرته له دې چې د کوم مشخص هېواد نوم واخلي وویل چې د افغانستان د متحدې جبهې د رهبرۍ غړی جنرال سمیع سادات د پخوانیو ځواکونو د انسجام لپاره د وضعیت برابرولو په موخه یوه مشخص هېواد ته سفر کړی دی.
د پخوانيو سرتېرو د نيولو او زنداني کېدو په تړاو د افغانستان د متحدې جبهې ادعا په داسې حال کې ده، چې د طالبانو د حکومت وياند ذبيح الله مجاهد د روان کال د ډسمبر په ١٣مه د امریکا د کانګرس د غړو د ورته اندېښنې په غبرګون کې دا “پروپاګند” بللى و. خو د پخوانیو سرتېرو د کورنیو یو شمېر غړو او د بشري حقونو یو شمېر بنسټونو هم تر دې مخکې دا ډول اندېښنې ښودلې دي.
که څه هم د افغانستان متحدې جبهې په افغانستان کې د پخوانیو پوځیانو د ادغام لپاره کوم مشخص هېواد نه دی یاد کړی، خو له تاجکستان پرته د افغانستان نورو ګاونډیو هېوادونو تر دې وړاندې په سیمه ییزو غونډو کې ویلي چې د افغانستان د وصعیت د تغییر لپاره د وسله والو هڅو ملاتړ نه کوي.
که څه هم د افغانستان متحده جبهه په امریکا کې جوړه شوې او دفتر یې هم په واشنګټن کې دی، خو د افغانستان لپاره د امریکا ځانګړی استازی توماس ویسټ چې د دوحې له غونډې وروسته امریکا ته ستون شو، په یوه ټویټ کې یې روښانه کړه چې هېواد یې د دوحې د فارمټ ددوام او دغه راز په نړیوال سیستم کې د افغانستان د ادغام لپاره د ملګرو ملتونو په مشرۍ د لارې نقشې د جوړولو د بهیر هرکلی کوي.