لندن (کوبهانیوز) – د انګلستان کرکټ بورډ وايي چې د افغانستان پر وړاندې به تر هغې د سریز لوبې نه کوي چې د ښځو د ورزش په اړه د طالبانو تګلاره بدله نه شي.
د انګلستان د کرکټ بورډ اجراییوي رییس، ریچارډ ګولډ په خپله تازه مرکه کې ویلي، چې په لڼډ مهال کې دوی په خپل مهالویش کې د افغانستان پر وړاندې د لوبو کوم سریز نه لري، خو په راتلونکي کې به تر هغه چې طالبان ښځینه کرکټرانو ته د ورزش اجازه ورنکړي، د انګلستان لوبډله به د افغانستان د کرکټ له ملي لوبډلې سره د سریز لوبې ونکړي.
ګولډ د نړیوال جام لوبو په اړه وویل، چې دا لوبې د کرکټ د نړیوالې شورا له خوا تنظیمیږي او انګلینډ اړ دی چې له افغانستان سره لوبې وکړي.
د انګلستان د کرکټ بورډ اجراییوي رییس وايي، د کرکټ نړیوالې شورا په خپله وروستۍ غونډه کې د دغه بورډ غړو هېوادونو ته ویلي چې د حکومتونو په داخلي سیاستونو کې لاسوهنه نه شي کولای.
په ۲۰۲۱ کال کې واک ته د طالبان له بیا ستنیدو سره، د ښځو د کرېکټ د لوبډلې په ګډون پر ښځينه لوبغاړو د لوبې کولو بندیز ولګېد او د افغان ښځو د کرېکټ ډېری لوبغالی استرالیا ته کډوالې شوې.
استرالیا هم تر دې مخکې د طالبانو د حکومت له خوا د ښځو پر ورزش د بندیز له کبله د افغانستان له ملي لوبډلې سره د کرکټ دوه سریزه لغوه کړل.
ټاکل شوې وه چې د افغانستان او اسټرالیا د کرکټ ملي لوبډلو ترمنځ د یو ورځنیو سیالیو لړۍ د روان کال په اګست میاشت کې په متحده عربي اماراتو کې ترسره شي، خو د اسټرالیا کرکټ بورډ یو ځل بیا اعلان وکړ چې د طالبانو لخوا د ښځو پر ورزش د بندیزونو د دوام له امله یې دغه لړۍ لغوه کړې ده.
د استرالیا دغه پرېکړه د افغانستان د کرکټ د ملي لوبډلې د لوبغاړو له سخت غبرګون سره هم مخ شوه.
د افغانستان د کرېکټ مشهور لوبغاړي، راشد خان ارمان تېره میاشت خبرداری ورکړ چې که اسټرالیا پر خپله پرېکړه له سره غور ونه کړي، نو دی به هم د دغه هېواد د کرېکټ لیګ (بیګ باش) کې د لوبېدو پر پرېکړه له سره غور وکړي، ځکه د راشد خان په وینا، هغه ته د افغانستان او د افغانانو خوښي تر بل هر څه مهمه ده.