استانبول (کوبها نیوز)- ۳۶ کلن عزت الله سادات د ترکیې په استانبول ولایت کې د بلیکدوزو سیمې د ښاروالۍ ټاکنو ته د نورو ۳۵ نوماندانو تر څنګ ولاړ دی. هغه غواړي دلته د میشتو افغانانو په ملاتړ ددې سیمې ښاروال شي او د ترکیې په سیاست کې افغانانو ته یوه نوې لاره پرانیزي.
د ترکیې محلي ټاکنې د مارچ میاشتې په ۳۱ مه نېټه ترسره کیږي.
بیلیکدوزو ولسوالي د یوه اروپايي ښار په معیار اباده ده، چې په شنو ساحو پوښل شوې او د پام وړ بهرنیو وګړو د نفوس په درلودو د مختلفو فرهنګونو کوربه ده.
په دې سیمه کې شاوخوا ۲۵ زره تنه افغاني الاصله ترکان اوسیږي چې د ولسوالۍ په تجارتي، سیاسي او نورو ټولنیزو فعالیتونو کې فعالانه ګډون لري.
عزت الله سادات د فاریاب ولایت د اندخوی ولسوالۍ اوسېدونکی دی چې په انقره کې له زده کړو وروسته یې تجارت او سیاست ته مخه کړې ده.
سادات کوبها نیوز ته په مرکه کې وویل چې دا لومړی ځل دی چې په ترکیه کې د افغانانو پرمخ سیاست ته د داخلېدو لاره پرانستل کیږي.
هغه وایي، ” په اروپا او د نړۍ نورو هېوادونو او دلته ترکیه کې د ښاروالۍ ټاکنې او له دې لارې خدمت ډېر ارزښت لري. زه د بیلیکدوزو د ښاروالۍ ټاکنو ته خپلواک نوماند یم”.
سادات چې د برکه په نامه یو خیریه بنسټ لري او ځان د افغان سوداګرو د انجمن بنسټګر ګڼي، په دې باور دی چې په بیلیکدوزو کې تر ۱۵ زرو پورې رایې لري.
هغه کوبها نیوز ته وویل:”دلته ټول شاوخوا ۲۵ زره افغانان اوسیږي، چې ۱۲ زره تنه د ټاکنو په شرایطو برابر دي خو دا ارقام نور هم ډیریږي ځکه یو شمېر ځوانان نوي پر اتلس کلنۍ پښه ږدي. د مارچ تر ۳۱مې به زما رایې شاوخوا ۱۵ زره وي”.
د ترکیې د ټاکنو د عالي شورا د اعلان له مخې د مارچ د ۳۱ مې نیټې په محلي ټاکنو کې به ۳۶ بېلابېل ګوندونه د ښاروالۍ او ښاري شوراګانو د کنټرول لپاره سیالي کوي.
د دغو ټاکنو په ترڅ کې به د ترکیې د ټولو ښارونو، او ولسوالیو ښاروالان او د ښاري شوراګانو غړي د يادو ښارونو د اوسېدونکو د مستقيمو رايو له لارې د پنځو کلونو لپاره وټاکل شي.
د ترکیې داځل ټاکنې له سختې سیالۍ سره مل دي او ډېر ترکان دغو ټاکنو ته له دې امله د ټولپوښتنې نوم ور کوي چې د رجب طیب اردوغان د ګوند او د هغه د مخالفانو ترمنځ یو اړخ غوره کیږي. استانبول د عدالت او پراختیا واکمن ګوند او اپوزیسیون دواړو ته مهم دی ځکه په دغه ولایت کې ماته او بری د ۲۰۲۸ کال د ټاکنو برخلیک ټاکي.

په دغسې رقابتي چاپیریال کې به یوه افغان نوماند ته څومره ممکنه وي چې د بیلیکدوزو د ښاروالۍ په ټاکنو کې له ګوندي نوماندانو سره سیالي وکړي؟
دې پوښتنې ته سادات خپله ځواب وایي: ” په دې ټاکنو کې د ۳۵ ګوندونو نوماندان ګډون لري. د رایو په حساب زه پنځم نوماند یم چې ډېرې رایې لرم. په دې سیمه کې ډېر افغانان دي، له همدې امله مې ځان ښاروالۍ پوسټ ته نوماند کړی”.
هغه وایي چې غواړي په ترکیه کې د افغانانو اعتبار اعاده کړي، غږ یې ورسوي او افغانان خپل ښاروال او خپل وکیل ولري.
د ترکیې په محلي ټاکنو کې پر عزت سادات سربېره یو بل افغان اصلان اسلام چې د کندهار اوسېدونکی دی، هم د استانبول د زیتون بورنو ولسوالۍ د ښاروالۍ ریاست ته ځان کاندید کړی.