کابل (کوبها نیوز) – د جګړې د مطالعاتو انسټیټیوټ وايي، د طالبانو مشر مولوي هبة الله اخندزاده انحصاري قدرت او تګلارو په افغانستان کې اقتصادي بحران او د طالبانو په منځ کې تاوتریخوالی زیات کړی.
د جګړې د مطالعاتو انسټیټیوټ په خپل ۳۷ مخیز راپور کې وايي، اوږدمهاله ننګونې طالبان د داخلي زیاتیدونکو مخالفتونو پر وړاندې اسیب پذیره کوي او په افغانستان کې د سلفي جهادي ډلو د کنټرول وړتیا یې را کموي.
راپور وايي، د حقاني شبکې مشر سراج الدین حقاني خپل خپلوان په مهمو پوستونو ګمارلي دي او د طالبانو مشر هبة الله اخندزاده په کندهار کې د مذهبي مشرانو او پلویانو له یوې کوچنۍ حلقې سره چې اکثره یې د “کندهاري طالبانو” په نوم یادیږي، پر افغانستان حکومت کوي.
“اخندزاده په کندهار کې پر خپل مرکز انحصاري واک نه لري. سره له دې چې د طالبانو ځینې مشران لکه د دفاع وزیر محمد یعقوب او د رییس الوزرا مرستیال عبدالغني برادر د اخندزاده په څېر کندهاریان دي، خو د هغه د پالیسیو خلاف دي.”
د جګړې د مطالعاتو انسټیټیوټ وايي، ملا برادر او ملا یعقوب ډېری په کابل کې واکمني کوي او په کابل کې د طالبانو له کابینې سره کار کوي، چې کله نا کله د “کابل طالبانو” په نوم یادېږي.
د “کابل طالبانو” دغه ډله کولی شي له حقاني شبکې سره همکاري وکړي، چې د طالبانو د واک په لومړیو کې یې په کابل او شاوخوا سیمو کې د طالبانو د ځواکونو قومانده او کنټرول پر غاړه درلود.
د دغه راپور له مخې، طالبانو د افغانستان په شمال کې د خپل ملاتړ د پراخولو لپاره د یوې ستراتیژۍ د یوې برخې په توګه د تاجیک طالبانو او ازبیک طالبانو ډلې پراخې کړې دي.
قاري فصيح الدين چې د طالبانو لوی درستیز دی، د تاجیک طالبانو لوړپوړى قوماندان او په حکومت کې د تاجیک طالبانو په مشرانو کې تر ټولو زيات نفوذ لري. د کرنې وزير عطاالله عمري او د ریاست الوزرا مرستيال عبدالسلام حنفي د ازبیک طالبانو دوه لوړ پوړي چارواکي دي”.
راپور زیاتوي چې ملا هبة الله اخندزاده وروستی پریکړه کوونکی دی او ډېر خپلسری شوی او د نورو طالب مشرانو پرېکړې تر پښو لاندې کوي.
طالبانو ددغه رپوټ پر وړاندې تر اوسه غبرګون نه دی ښودلی.