کابل (کوبها نیوز) – د افغانستان د کړکیچ د حل په موخه د دوحې درېیمې ناستې ته څه باندې یوه میاشت پاتې ده او د دغې ناستې لپاره د چمتووالي په لړ کې پر طالبانو فشارونه پر ډیریدو دي ترڅو په دی ناسته کې ګډون وکړی.
په داسې حال کې چې د سیمې هېوادونه له یو بل سره سلا مشورو ته دوام ورکوي، ظاهراً هغه اجماع چې د دوحې له دویمې ناستې مخکې د روسیې، چین، پاکستان، ایران او د منځنۍ اسیا د یو شمېر هېوادونو ترمنځ موجودې وه، له منځه تللې ده.
په کابل کې د ایران سفیر او د روسیې د ولسمشر ځانګړي استازي تېره اوونۍ د طالبانو له حکومت سره ژمنه وکړه چې “دوی به په هره نړیواله غونډه کې د کابل د دریځ ملاتړ کوي،” خو پاکستان له طالبانو سره دا ډول ژمنه نه ده کړې او چین تریې غوښتنه کړې چې د نړیوالۍ ټولنۍ غوښتنی دی ومني.
دوحې ته د افغانستان لپاره د امریکا د ځانګړي استازي، ټام ویست له سفر وروسته، د قطر د بهرنیو چارو مرستیال وزیر محمد بن عبدالعزیز الخلیفي درې ورځې وړاندې کابل ته تللی او اوس هم په کابل کې دی، هڅه کوي طالبان قانع کړي چې امیر خان متقی د دوحې دریمې ناستې ته واستوي.
د قطر د بهرنیو چارو وزارت په اعلامیه کې د الخلیفي له قوله راغلي: “د قطر حکومت د افغانستان د کړکېچ د حل لپاره د خبرو اترو پر اهمیت باور لري، څو د افغانستان ستونزې ته دایمي حل لاره ومومي او دغه هیواد د سیمې او نړۍ د سولې او ثبات په ټینګښت کې ونډه واخلي. د افغانستان سرپرست حکومت باید په نړیوالو بحثونو کې شامل شي.”
د قطر د بهرنیو چارو مرستیال وزیر د جمعې په ورځ د طالبانو د بهرنیو چارو له سرپرست وزیر، امیر خان متقی سره په لیدنه کې هغه ته بلنه ورکړه چې د دوحې په دریمه ناسته کې ګډون وکړي.
د طالبانو د حکومت د بهرنیو چارو سرپرست وزیر له الخلیفي سره په کتنه کې د دوحې په ناسته کې په افغانستان کې د اقلیم د بدلون د اغیزو، له خصوصي سکتور سره د همکارۍ او له نشه یي موادو سره د مبارزې په برخه کې د همکارۍ په اړه له خبرو څخه خوښي څرګنده کړه. خو د طالبانو د بهرنیو چارو وزارت په اعلامیه کې د دوحې په دریمه ناسته کې د ګډون لپاره د طالبانو د حکومت د اساسي شرطونو او غوښتنو یادونه نه ده شوې.
د طالبانو د بهرنیو چارو وزارت اعلامیې د قطر د بهرنیو چارو د وزارت د مرستیال له خولې ویلي چې الخلیفي د دوحې د دریمې ناستې په اړه د طالبانو د حکومت غوښتنې منلې او ټینګار یې کړی چې د طالبانو له شتون پرته د دوحې غونډه به له وضعیت سره مرسته ونه کړي.
د دوحې په مخکینې غونډه کې چې د طالبانو د حکومت د استازي په نه شتون کې د فبرورۍ په ۱۸ او ۱۹مه جوړه شوې وه، د بهرنیو دیپلوماتانو سربېره څلورو افغان مدني فعالانو هم برخه اخیستې وه، خو د دې ناستې د دریمې دورې لپاره تراوسه د هغو جبهو په شمول چې له طالبانو سره د پوځي مخالفت ادعا کوي، د طالبانو د سیاسي مخالفو جریانونو استازي هم دوحې ته نه دی ور بلل شوی.
ملګرو ملتونو په روانه اونۍ کې اعلان وکړ چې د دوحې درېیمه غونډه به د جون په ۳۰مه او د جولای په لومړۍ نېټه د دغه سازمان د سرمنشي، انتونیو ګوتریش په مشرۍ او د هیوادونو د ځانګړو استازو او بهرنیو دیپلوماتانو په ګډون جوړه شي.