کابل (کوبهانیوز) – د مارچ په ۲۶مه، یوه ځانمرګي بریدګر د قراقرم پر سړک د چینايي کارګرانو له یوه بس سره چې داسو بند ته پر لاره وو، ځانمرګی برید وکړ چې له امله یې پنځه چینايي انجینران ووژل شول.
د پاکستان د پوځ ویاند، جنرال احمد شریف د سه شنبې په ورځ په یوه خبري غونډه کې ادعا وکړه چې د دوی پلټنې ښيي چې برید په افغانستان کې تنظیم شوی و او ځانمرګی یو افغان وګړی و او موټر بم هم له افغانستانه سیمې ته راوړل شوی و.
خو د طالبانو حکومت د پاکستان د پوځ دا ادعا بې اساسه بولي او وايي چې پاکستان د دې هېواد په امنیت کې د پاتې راتلو پړه پر نورو اچوي.
د طالبانو د دفاع وزارت ویاند، عنایت الله خوارزمي په یوه بیان کې ویلي چې د خیبر پښتونخوا په سیمه کې چې د پاکستان د پوځ تر سخت امنیتي پوښښ لاندې دی، د چینايي اتباعو وژل کېدل د پاکستان د امنیتي ځواکونو کمزورتیا یا له برید کوونکو سره د دوی همکاري ښيي.
خوارزمي ویلی چې د طالبانو حکومت چین ته ډاډ ورکړی او بیجینګ هم په دې پوه شوی چې افغانان په دې ډول فعالیتونو کې ښکیل نه دي.
خو د دې تر څنګ د طالبانو د دفاع وزارت ویاند پاکستان په افغانستان کې د داعش د بریدونو لپاره د زمینې په برابرولو تورن کړی دی.
د طالبانو د دفاع وزارت په اعلامیه کې د عنایت الله خوارزمي له قوله ویل شوي: “موږ د داعش خوارجو ګڼ موارد لرو چي د پاکستان خاورې څخه افغانستان ته را اوښتي، د هغوی خاوره زموږ په ضد کارول شوې او پیښي له هغه هیواد څخه تنظیم کیږي چې پاکستان یې باید په اړه ځواب ووايي.“
پر چينايي انجنيیرانو له بريد او د پنځو انجنییرانو وژل کېدو وروسته بيجينګ پاکستان ته يو پلاوى واستاوه او په دې اړه يې پلټنې وکړې، خو له دې بريده د څه باندې يوې مياشې له تیریدو سره سره، چینايي چارواکو د دغه برید د عاملینو په اړه څه نه دي ویلي.
له دی بریدو وروسته په خیبر پښتونخوا او د پاکستان په یو شمیر سیمو کې د چین یو شمېر پرمختيايي پروژو کارونه ودرېدل.
د طالبانو د حکومت او پاکستاني پوځ د پوځي چارواکو له خوا پر یو بل وروستی تورونه په داسی حال کې دی چې په دې وروستیو کې د افغانستان لپاره د پاکستان ځانګړي استازي، اصف دراني هم ادعا کړې چې هند په افغانستان کې د یو شمیر عناصرو په کارولو سره د پاکستان امنیت ګواښي.
دا په داسې حال کې ده چې تېره اوونۍ او په ورته وخت کې په هند کې د سیمه ییزو ټاکنو په درشل کې د هند د واکمن ګوند (بي جي پي) د مشرتابه غړو هم پر پاکستان تور ولګاوه چې د تندلارو ډلو په کارولو سره په سیمه کې د هند امنیت او ګټې ګواښي.