“په دولتي ادارو کې د کار روحیه نشته، مامورین په دوو برخو ویشل شوي (اوسني او مخکیني). د طالبانو مامورین او حتی چارواکي د جمهوریت د وخت کارکوونکي له روحي پلوه ځوروي، هغوی ته پیغورونه ورکوي چې شل کاله مو د امریکا غلامي کړې.” یو پخوانی دولتي کارکوونکی
کابل: (کوبهانیوز ۱۶ حمل ۱۴۰۳) – د جمهوريت له پرځېدو وروسته د طالبانو په واکمنۍ کې ډیری دولتي کارکوونکو د پخوا په څېر خپلو دندو ته دوام ورکړ، خو دغه کارکوونکي له ډیر وخت راهیسې له روحي پلوه ځورول کیږي.
د طالبانو په حکومت کې بیلابیلو سرچینو کوبها نیوز ته وویل چې دامهال د طالبانو په ډیرو دولتي ادارو کې د طالبانو حکومتي مامورین او چارواکي له پخوانیو مامورینو سره ناوړه، سلیقوي او د اداري اصولو خلاف چلند کوي او هغوی له روحي پلوه شکنجه کوي.
د جمهوریت د وخت یوه کارکوونکي چې لاهم د طالبانو حکومت کې مامور دی، د نوم نه ښودلو په شرط کوبها نیوز ته وویل: “په دولتي ادارو کې د کار روحیه نشته، مامورین په دوو برخو ویشل شوي (اوسني او مخکیني). د طالبانو مامورین او حتی چارواکي د جمهوریت د وخت کارکوونکي له روحي پلوه ځوروي، هغوی ته پیغورونه ورکوي چې شل کاله مو د امریکا غلامي کړې. دا وضعیت د ډېرو لپاره د زغم وړ نه دی.”
د جمهوریت د وخت یوه بل کارکوونکي چې تازه یې له خپلې دندې استعفا کړې او اوس په کور ناست دی، کوبها نیوز ته وویل: “په اداره کې به هره ورځ د جمهوریتي او امارتي کارکوونکو خبرې وې، دوی هره ورځ پخواني کارکوونکي دې ته مجبورول څو خپلې دندې پریږدي. ما هم نور بیځایه پیغورونه ونه شوای زغملی او دنده مې پرېښوده. اوس په کور ناست یم، غواړم یو شخصي کار وبار شروع کړم.”
نوموړي همداراز اندېښنه وښوده چې دولتي ادارو کې ورځ په ورځ د مسلکي کسانو ځای غیر مسلکي او بیسواده کسان نیسي او دا وضعیت ښایی په دولتي ادارو کې د انارشۍ سبب شي.
د افغانستان د جمهوري نظام له نسکورېدو سره هممهال د مخکیني ولسمشر اشرف غني په ګډون ګڼ جګپوري چارواکي او دولتي کارکوونکي له هیواده ووتل خو د طالبانو د مشر له خوا د عفوې تر فرمان وروسته یوه لویه برخه دولتي کارکوونکي د پخوا په څېرو خپلو دندو ته حاضر شول.
د طالبانو چارواکي ظاهرا په غونډو کې وایي، چې د دوی د مشر د عفوې فرمان له مخې د دولتي مامورینو ترمنځ تفکیک موجود نه دی او ټول له مساوي حقونو برخمن دي، خو تېره اونۍ د دوی د عدلیې وزیر په یوه غونډه کې د حزب اسلامي د مشر ګلبدین حکمتیار نیوکو ته په ځواب کې وویل چې ډېر خلک له افغانستان نه ووتل او دی هم چې په تنګ دی، ودې وځي.