کوبها نیوز(۱۸ حمل ۱۴۰۳)
د طــــ.البانو مشر د کوچني اختر په مناسبت خپل پیغام کې د نجونو پرمخ د ښوونځيو او پوهنتونونو دروازو د پرانستې په اړه، چې د افغانستان د خلکو اساسي غوښتنه ده هیڅ اشاره نه ده کړې.
ملاهبت الله د کوچني اختر په مناسبت پیغام کې د نجونو تعلیم ته له اشارې پرته دومره ویلي، چې د نوي نسل د دیني او عصري علومو زده کړو لپاره په ټولو ولایتونو او ولسوالیو کې سلګونه دیني او علمي مرکزونه فعال دي.
ملاهبـــت الله ویلي؛« د نوي نسل د دیني او ورسره د عصري زده کړو لپاره په ټولو ولایتونو او ولسوالیو کې د پوهنې وزارت پراخ تشکیلات لري او په سلګونه دیني، علمي مرکزونه یې فعال کړي، د ټولو یتیمانو د روزنې، تعلیم او ښه کفالت لپاره په هر ولایت او یو شمېر ولسوالیو کې دارالایتامونه را منځته شوي، چې د مستقل ریاست له خوا اداره کیږي.د خپلو اولادونو ښه تربیه کول، تعلیم پرې کول او دا فرصت ورته برابرول چې دیني زده کړې وکړي، د هر مسلمان ورور مکلفیت او وظیفه ده.»
نوموړي ویلي چې د جوماتونو ملا امامان مسوولیت لري چې د خپلو مقتدیانو او د هغوی د اولادونو عقائد او اعمالو اصلاح ته پاملرنه وکړي او له معاصرو فتنو یې وساتي.
د ط.البانو مشر یوځل بیا ویلي، چې د دوی محاکم د عدلت تامین، شرعي حدودو او تعزیراتو د عملي کولو برخه کې له توپیر پرته چلند کوي.
نوموړي له ټولو هیوادونو په ځانګړې توګه له اسلامي نړۍ سره د مثبتو روابطو پر دوام ټینګار کړی او ویلي یې، چې دوی د متقابل درناوي پر اساس له نړۍ سره روابط غواړي.
ملا هبـــت الله ویلي« موږ د خپلې اسلامي او شرعي تګلارې له مخې له هر چا سره په متقابل درناوي ولاړې ښې اړیکې غواړو، او له هر چا څخه هم غوښتنه کوو چې زموږ دغه نیک نیت او ارادې ته د شک په نظر ونه ګوري، زموږ قول او تعهد دی، له دوی څخه هم د افغانستان حریم، ګټو، او عزت ته د پام کولو توقع لرو او غواړو چې ښې اړیکي راسره وپالي.»
د ط.البانو د مشر دغه اختریز پیغام داسې مهال دی، چې د نږدې درې کاله کیږي د افغان نجونو پرمخ د ښوونځیو او پوهنتونونو دروازې تړل شوي دي.
څو ورځې وړاندې د مسلمانانو د نړیوال لیګ منشي محمد بن عبدالکریم آل عیسی هم له ط.البانو وغوښتل څو تردې زیات د اسلامي نړۍ په منځ کې د یوې تُندلارې ډلې په توګه ځان منزوي نه کړي.
نوموړي وویل چې اسلامي نړۍ ورځ په ورځ پر ط.البانو خپل باور له لاسه ورکوي.