کابل: ( ۲ وری ۱۴۰۳ کوبهانیوز): د غلام خان بندر لاره چې، د ډیورند کرښې په اوږدو کې د پاکستاني ځواکونو او طالبانو ترمنځ د شخړې له امله تړل شوې وه، نن (وري ۲مه) بېرته خلاصه شوه.
په خوست ولایت کې سیمهييزو سرچینو کوبهانیوز ته ويلي چې دا لاره د سوداګرۍ او عامو خلکو د تګ راتګ پر مخ خلاصه شوېده.
خو رسمي سرچینو تر اوسه د عامو خلکو د تګ راتګ د اجازې په تړاو څه نه دي ويلي.
بل خوا د ډیورند کرښې دواړو خواو ته له قومي مشرانو جوړه جرګه چې د سوداګریزو بندرونو د بیرته خلاصېدو په هدف هڅې کوي وايي، د انګور اډې او کورمې ترمنځ د خرلاچي بندر د بېرته خلاصېدو لپاره یې هڅو پايله نه ده ورکړې.
خو دې جرګې ويلي چې تمه لري یاد بندر به هم ډیر ژر خلاص شي.
غلامخان بندر تر تورخم او سپينبولک وروسته د افغانستان او پاکستان ترمنځ د سوداګرۍ او تګ راتګ لپاره درېیمه مهمه لار بلل کېږي.
دا بندر په داسې حال کې بېرته خلاصېږي چې تېره ورځ د پاکستان د دفاع وزیر خواجه اصف ويلي و، که طالبان د ده په ټکو “په افغانستان کې د پاکستان ضد مېشتو عناصرو” پر ضد ګام پورته نهکړي، د ګوادر بندر به د افغان سوداګرو پر مخ وتړي.
د طالبانو ویاند ذبیح الله مجاهد د خواجه اصف د دې څرګندونو په غبرګون کې ويلي: “د افغانستان خاوره به د هیڅ هېواد پر ضد و نه کارېږي، هيله ده پاکستان هم دا مساله په پام کې ونیسي.”
تر دې وړاندې طالبانو په ګوادربندر کې افغان سوداګرو ته د اسانتیاوو برابرولو په بدل کې، پاکستاني سوداګرو ته په غلامخان بندر کې اجازه ورکړې وه چې د افغانستان له لارې خپل سوداګریز توکي منځنۍ اسیا ته انتقال کړي.
د غلامخان بندر لار د سوداګرۍ پرمخ خلاصه شوه
