کابل: ( ۲۸ کب ۱۴۰۲): پر افغان خاوره د پاکستاني پوځیانو هوايي تیریو کې اووه ماشومان او څلور مېرمنې وژل شوي او درې ماشومان ټپيان شوي دي. دا هوايي بريدونه تېره شپه ناوخته د پکتیکا د برمل ولسوالۍ اړوند لمن او د خوست د سپیرې ولسوالۍ په پڅهميله مداخېلو وزیرو سیمو کې شوې دي.
پاکستاني رسنيو د دغه هېواد د امنیتي سرچینو په حواله خبر ورکړی چې ګواکې، په دې هوايي بريدونو کې يې د عبدالله شاه مسید په نوم د پاکستان طالبانو د تحریک قوماندان وژلی؛ خو د دې ادعاوو تر خپرېدو وروسته، پر خواله رسنیو د “ټي ټي پي” د دغه قوماندان يوه ویډیو خپره شوه چې نوموړي پکې د ځان په تړاو خپاره شوي رپوټونه بېبنسټه بولي او وایي د وزیرستان د شوال په غرنیو سیمو کې اوسیږي.
د طالبانو غبرګون
د طالبانو حکومت له دې بريدونو څو ساعته وروسته پر افغان خاوره د پاکستاني الوتکو د هوایي بریدونو پخلی وکړ. ذبیح الله مجاهد له رسنیو سره خبرو کې ومنله چې پاکستاني الوتکو د افغانستان پر ځينو سیمو هوايي بریدونه کړي، خو د اوښتې مرګ ژوبلې په تړاو یې څه ونه ویل.
د طالبانو حکومت په يوه اعلامیه کې دا بريدونه “غيرسنجيده اقدام او د افغانستان په حریم تیری” بللی دی.
په دې اعلامیه کې ويل شوي: “د عبدالله شاه په نامه کس چې پاکستانی اړخ یې په پيښه کې د په نښه کیدو ادعا کوي په پاکستان کې دی.”
له دې سره هممهال د طالبانو د حکومت د دفاع وزارت سرپریت ملا یعقوب، خپل تصویر په نظامي یونیفورم کې خپور کړ او څرګنده یې کړه چې د پاکستان د یرغل په ځواب کې يې د ډیورند کرښې پورې غاړې ته د پاکستاني پوځيانو پر پوستو بریدونه کړي او لاهم روان دي.
کوبهانیوز ته محلي سرچینو وویل چې دا جګړې د خوست په تڼیو، سپیره، د پکتیا ډنډ پټان او د پکتیکا برمل او لواړه اوسنیو سرحدي سیمو کې شوې دي. سرچینې په دې جکړه کې د دوه طالبانو، اوو ماشومانو او څلور مېرمنو د وژل کېدو پخلی کوي، خو ښایي مرګ ژوبله تر دې ډېره وي.
په ورته وخت کې پاکستاني رسنیو په دې تړاو خپاره کړي رپوټ کې ويلي چې، له طالبانو سره په نننۍ نښتو کې یو پاکستانی چکپوړی پوځي افسر وژل شوی دی.
غبرګونونه
ملګرو ملتونو کې د افغانستان د دایمي استازولۍ سرپرست نصير احمد فايق پر افغان خاوره د پاکستان هوايي بریدونه د نړیوالو قوانینو او د افغانستان له ځمکنۍ بشپړتیا او حاکمیت ښکاره سرغړونه بللې ده.
فایق په خپله ایکسپاڼه لیکلي: “موږ دغه کړنې په کلکه غندو. د افغان ښځو او ماشومانو وژنه د منلو وړ نه ده او هیڅ امنیتي ګواښ نه شي توجیه کولی”.
بلهخوا پخواني ولسمشر حامد کرزي دا هوايي بریدونه د افغانستان له ځمکنۍ بشپړتیا د پاکستان ښکاره سرغړونه بللې ده.
د کزري له مطبوعاتي دفتره په خپره شوې خبرپاڼه کې راغلي، چې حامد کرزی دغه بريدونه په کلکو ټکو غندي او د پاکستان دا ډول کړنې د دواړو هېوادونو د اړيکو په زيان بولي.
تر دې مخکې تېر لمریز کال د وري په ۳۰مه نېټه هم پاکستاني جیټ الوتکو د خوست د سپېرې ولسوالۍ پر څلورو کلیو هوايي بريدونه کړي وو. په هغو هوايي بريدونو کې د مېرمنو او ماشومانو په ګډون ۴۷ وزیرستاني بېځایه شوي وژل شوي او لږ تر ۲۵ نور ټپيان وو.