اسلام اباد (کوبا نیوز)- د پاکستان د دفاع وزیر خواجه محمد اصف وايي، په دغه هېواد کې د ” ترهګرۍ” اصلي سرچینه په افغانستان کې ده.
نوموړي چې د طالبانو او امریکا تر منځ د دوحې هوکړې له لاسلیک وروسته،په یوه ټویټ کې چې وروسته ډیر مشهور هم شو دغه بریا خورا ستایلې وه، خو واک ته د طالبانو تر رسیدو وروسته یې د دې ډلې د حکومت پر وړاندې مخالف دریځ غوره کړی.
خواجه محمد اصف د یکشنبې په ورځ د پاکستان په سیالکوټ ښار کې خبریالانو ته وویل: « زموږ پر وړاندې زیاتره ترهګریزې پېښې له افغانستان څخه ترسره کېږي، دا د هغو خلکو له خوا تر سره کیږي ،چې هلته مېشت دي، یو شمېر ترهګر له افغانستان څخه د « ډیورنډ » سرحدي سیمو له لارې خیبر پښتونخوا او بلوچستان ته دا داخلیږي»
د پاکستان د دفاع وزیر وايي، چارواکو په تېرو وختونو کې په پاکستان کې د وسله والو پټنځایونه په نښه کړي وو او اسلام اباد په افغانستان کې هم د هغوی له پټنځایونو خبر و.
هغه وويل: « موږ په دې اړه له افغانستان سره هم خبرې کړې دي.»
د پوځي چارو شنونکو په اند، له ۲۰۰۱ څخه تر ۲۰۲۱ کال پورې افغان حکومت او د ناټو او متحده ایالاتو ځواکونو د پاکستان حکومت د افغانستان پر ضد د پاکستاني طالبانو، حقاني شبکې او طالبان پر ملاتړ تورناوه، خو افغانستان کې د جمهوري نظام تر نسکورېدو وروسته،اسلام اباد پر کابل د تور لګولو سیاست په غوره کولوسره غواړي، د ځان پر وړاندې د نړۍ ذهنیت تغییر کړي.
تېر کال، په پاکستان کې د« TTP» د بریدونو زیاتوالي د طالبانو له حکومت سره د دغه هېواد اړیکې خړې پړې کړې او اسلام اباد یې د ۲۰۲۳ کال په نومبر کې د افغان کډوالو د ایستلو کمپاین ته اړ کړ.

د پاکستان د دفاع وزير په شمالي وزيرستان کې وروستي بريد ته په اشارې، چې اووه پاکستاني پوځيان پکې ووژل شول وويل ، چې د دغو بريدونو يو شمېر عاملين موندل شوي او اسلام اباد دغه موضوع له طالبانو سره شريکه کړې ده.
هغه زیاته کړه: « پاکستان یو خپلواک هیواد دی او هغه افغانان چې غواړي پاکستان ته ننوځي کولای شي دسفر په معتبرو اسنادو،لکه پاسپورت او ویزې له لارې پاکستان ته داخل شي.
د طالبانو حکومت تل په افغانستان کې د پاکستاني طالبانو د حضور په اړه د پاکستان د حکومت ادعاوې رد کړي او ویلي یې دي چې اسلام اباد باید خپلې امنیتي ستونزه په خپل هېواد کې حل کړي.