کابل (کوبها نيوز)- ټاکل شوې د دوشنبې پر ورځ د پاکستان د سوداګرۍ وزارت يو پلاوى کابل ته په دوه ورځني سفر راشي.
د پاکستان د بهرنيو چارو وزارت وتیي، د سوداګرۍ وزارت د معیین محمد خرم اغا په مشرۍ د دوى پلاوى به د دواړو هېوادونو ترمنځ د سوداګرۍ اړوند مسایلو په اړه خبرې وکړي.
کابل کې د طالبانو د سوداګرۍ وزارت هم منلې ده چې ددوشنبې په ورځ د پاکستاني پلاوي کوربه دي.
پاکستان له اوږدو کلونو راهیسې د افغانستان پر وړاندې د سوداګریزو فشارونو پالیسي غوره کړې، په ځانګړې توګه د ترانزیتي لارو او مهمو بندرونو تړل، چې له امله یې د سوداګرۍ بهیر د بې باورۍ او خنډ او د چابهار بندر ته د افغانستان د رجوع لامل شوی دی.
د دوشنبې ورځې په غونډه کې به د افغان سوداګرو د کانټینرونو پر ځنډ، د موټرچلوونکو د ویزو پر ستونزو، سرحدي ستونزو او د تازه مېوو او سبزیجاتو د صادراتو په اړه خبرې وشي.
د غټو کانتینرونو د ترانزیت لپاره د اسنادو په تړاو د پاکستان وروستیو تګلارو او د پاکستاني ویزو د ترلاسه کولو په برخه کې د افغان موټر چلوونکو لپاره قوانینو سختولو د افغان سوداګرو ستونزې دوه چنده کړې او د ورځې له ۱۵۰۰ تر دوه زره لارۍ مالونه اوس خپل حد اقل کچې ته رالوېدلي.
په ورته وخت کې د پلاوي سفر په داسې وخت کې دی چې د کابل او طالبانو حکومت ترمنځ اړیکې تر هر بل وخت ډېرې ترینګلې شوې دي.
پاکستان د تېرې دوشنبې پر ورځ پر افغان خاوره هوايي بمباري وکړه، چې ولسي خلکو ته يې مرګ ژوبله واړوله. طالبانو يې غبرګون کې د پاکستان په پوځي تاسيساتو بريدونه وکړل او یو شمېر تجارتي لارې وتړل شوې.
دې ته په کتو داسې اټکل دی چې دغه ټيټپوړی پلاوى به په دې تاوجن وضعیت کې د کابل او اسلام اباد ترمنځ د تجارتي اړیکو په غوړولو کې مهمې پرېکړې ونه کړای شي.
د پاکستان دفاع وزير او نورو سياستوالو له وړاندې ويلي چې که طالبان خپله جغرافيه کې ددوی په وینا، د پاکستاني طالبانو پرضد ګام وانخلي دوى به له هند سره د افغانستان سوداګريزه لار وتړي.