دهلی (کوبهانیوز) – راشد خان کرکټ د افغانانو د خوښۍ لامل ګڼي او هیله لري چې اسټرالیا به له افغانستان سره د کرکټ لوبه لغوه نه کړي.
د افغانستان د کرکټ ملي لوبډلې لوبغاړی راشد خان چې د هند د کرکټ لیګ (IPL) په وروستیو لوبو کې یې په خپلو بریاوو سره یو ځل بیا د نړۍ په ځانګړې توګه د اسټرالیا د کرکټ مینه والو پام ځان ته اړولی، له PTI ورځپاڼې سره په خپله تازه مرکه کې ویلي چې اوسمهال کرکټ د افغانانو لپاره د خوښۍ او تفریح سرچینه ده او اسټرالیا باید د سږ کال د شل اوریزو لوبو په لغوه کولو سره دا خوښي له دوی څخه نه اخلي.
د اسټرالیا کرکټ بورډ په دې وروستیو کې اعلان وکړ چې د ط.البانو لخوا په افغانستان کې د نجونو پر زده کړو او د ښځو پر کار د لګیدلو بندیزونو په غبرګون کې به اسټرالیا د افغانستان له ملي لوبډلې سره د کرکټ شل اوریزې سیالۍ لغوه کړي چې ټاکل شوې وه د دې کال په وروستیو کې په متحده عرب اماراتی کې ترسره شي.
راشد خان وايي چې د لوبو لغوه کول د حکومتونو کار دی او هېڅ نه شي کولای، خو وايي چې دی د اسټرالیا په کورني لیګ (بیګ باش) لوبو کې له ګډون سره غواړي چې نړۍ ته د سولې پیغام او خپلو خلکو ته خوشحالي ورسوي.
تېر کال اسټرالیا د ښځو پر وړاندې د ط.البانو د ځپونکو سیاستونو په اعتراض کې د افغانستان له ملي لوبډلې سره د کرکټ لوبه لغوه کړی وه.
راشد خان: کرکټ د افغانانو د خوښۍ لامل دي، هیله لرم چې اسټرالیا به له افغانستان سره د کرکټ لوبه لغوه نه کړي
