مسکو (کوبها نیوز) – روسیه وايي، افغانستان دغه هیواد ته نژدې پروت ملک دی او مسکو غواړي چې د نړۍ د نورو هیوادونو په څیر ورسره په اړیکه کې واوسي.
د روسیې د ولسمشر ویاند دیمتري پیسکوف نن سه شنبه رسنیو ته وویل چې دوی د طالبانو له حکومت سره د اړیکو هڅې پیل کړې او غواړي چې پر “مهمو مسالو” ورسره خبرې وکړي.
پیسکوف وايي: “افغانستان موږ ته نږدې پروت هیواد دی او موږ په یوه او بله لار ورسره اړیکه ساتو. موږ اړ یو چې یو لړ مهم مسایل حل کړو او دا خبرو ته اړتیا لري. نو د همدې لپاره موږ د نورو هیوادونو په څیر له دوی (طالبانو) سره په اړیکه کې یو، ځکه هغوی پر افغانستان حاکم دي.”
خو د روسیې د ولسمشر ویاند د ده په ټکو د “مهمو مسالو” په اړه چې مسکو غواړي په اړه یې له طالبانو سره خبرې وکړي، جزئیات نه دي ورکړي.
په مسکو کې د کنسرت پر یوه سالون د دوه اونۍ وړاندې برید وروسته د روسیې ولسمشر د سیمې د یو شمیر هیوادونو، په ځانګړې توګه د منځنۍ اسیا هیوادونو له مشرانو سره د پېښې د عاملانو او په دې برخه کې پر همکاریو ټیلفوني خبرې وکړې، خو مسکو تر اوسه له طالبانو سره په دې اړه رسمآ خبرې نه دي کړې.
د مسکو په برید کې ۱۴۴ تنه ووژل شول او د روسیې امنیتي ادارو د پېښې په تړاو د منځنۍ اسیا هیوادونو یو شمیر وګړي نیولي چې ډیری هغه د تاجکستان دي او له داعش ډلې سره په اړیکه لرلو تورن دي.
له طالبانو سره د اړیکو جوړولو او خبرو د پیل په تړاو د مسکو نوې هڅه په داسې حال کې ده چې د روسیې د بهرنیو چارو او د عدلیې وزارتونو تازه پر داسې یوې طرحې کار پیل کړی چې پر اساس به یې مسکو طالبان د ترهګرو ډلو له نوملړ څخه وباسي او د طالبانو د حکومت پر چارواکو به ځینې بندیزونه لرې کړي.
د روسيې په بهرنيو چارو وزارت کې سرچينو رسنیو ته ویلي چې د بهرنيو چارو وزارت او د عدليې وزارت اوس پر دغه پلان کار کوي او که نهايي شي، د طالبانو نوم به د ترهګرو ډلو له نوملړ څخه وویستل شي.
روسیې په ۲۰۰۳ کال کې وروسته له هغې طالبان د ترهګرو ډلو په نوملړ کې شامل کړل چې د ملګرو ملتونو امنیت شورا د طالبانو نظامي کړنې او فعالیتونه تروریستي اعمال وبلل.