لندن(کوبها نیوز)- د افغانستان د ملي امنیت پخوانی رییس وايي، د ډیورنډ کرښې له رسمیت پېژندلو پرته له پاکستان سره د دوستۍ ادعا ګرانه ده.
احمد ضیا سراج په لندن کې د یوه نوي سیاسي خوځښت «آزادۍ او پراختیا مرکز» د پرانستلو په مراسمو کې د وینا پر مهال وویل چې د اشرف غني په حکومت کې پرېکړې انفرادي وې او دې کار د حکومت او خلکو ترمنځ واټن زیات کړ.
سراج چې د اشرف غني په حکومت کې د ملي امنیت رییس و، وايي، افغانستان د بهرنیو ځواکونو له وتلو وروسته د ترهګرو ډلو په مرکز بدل شوی دی. سراج ادعا کړې، چې “القاعده، بوکو حرام، الشباب او نورې سیمه ییزې او بهرنۍ ترهګرې ډلې په افغانستان کې د حکومت په همکارۍ ځای پر ځای شوې او له افغانستان نه بهر د اهدافو لپاره کار کوي.”
دا لومړی ځل دی چې یو پخوانی افغان چارواکی په افغانستان کې د بوکو حرام او الشباب ډلو د شتون خبره کوي.
د دغه پخواني افغان چارواکي په وینا، د طالبانو حکومت مشروع نه دی او له دغه رژیم سره د تړونونو لاسلیکول مشروعیت نه لري.