کابل: (۱۱ وری ۱۴۰۳ کوبهانیوز): د طالبانو حکومت د عداليې وزارت سرپرست له ګلبدین حکمتیار سره د ځمکې او دفتر د تخلیې په تړاو تازه څرګندونې کړې دي.
مولوي عبدالحکیم شرعي، د ياد وزارت د ‘مدرسة العدالة’ څخه د حدیثو دورې فراغت غونډې ته په وينا کې وويل، هغه (حکمتیار) په درناوي او خپله خوښه بل کور ته انتقال شوی.
شرعي ظاهرا ددغه وزارت او ګلبدین حکمتیار او د هغه د زوی ترمنځ ناندریو او څرګندونو ته په اشارې وايي: “که ته اوس دا احترام بې احترامي بولې، نو ته په احترام نهپوهېږې، عقل دې کار نه کوي.”
نوموړي ښايي د حکمتیار د زوی حبیبالرحمن حکمتیار وروستيو پوسټونو ته په اشاره وايي: “بیا دا خبرې کوې، زموږ حزب زموږ حزب. د احزابو ریاست زموږ د وزارت له تشکیلاتو نه تېر کال لغو شوی، احزاب په قانوني لحاظ سره دې نظام کې ځای نهلري، د احزابو نوم اخیستل تاته یو جرم دی”
حبیب الرحمن حکمتیار تر دې مخکې په خپله اېکسپاڼه پر لپسې پوسټونو کې د حزب اسلامي د سولې د هوکړهلیک څرنګوالی یاد کړی او همداشان يې د خپل پلار سره د کور د تخلیې په مسله کې شوی برخورد ناوړه چلند بللی و.
د طالبانو د عدالیې وزير له خوا د ګوندونو نوم یادول تر جرم ګڼلو وروسته، حبیب الرحمن حکمتیار په خپله ايکسپاڼه ولیکل: ” حزب “
د طالبانو حکومت د عدليې وزارت سرپرست په یاده غونډه کې پر دې سربېره يادونه کړې ده، چې ګواګې حکومت يې په قانوني خلا کې واقع نه دی.
شرعي د خپلو قوانینو اساس قران او حدیث ياد کړي دي.