کابل(۵ وری ۱۴۰۳ کوبها نیوز): طالبانو کابل کې د حزب اسلامي دفتر محاصره کړی او تر سبا اته بجو یې د تخلیې کولو ضرب الاجل ور کړی.
د حزب اسلامي یوې سرچینې کوبها نیوز ته وویل چې د طالبانو د دولتي ځمکو د تصفیې کمیسیون له حزب اسلامي سره له تېرې یوې اونۍ د هغه د کور او دفتر د ځمکې پر سر په خبرو بوخت و، خو ددواړو خواوو ترمنځ توافق نه دی شوی او حکمتیار ته د کور او دفتر د تخلیې امر شوی.
“طالبان تر دوو کلونو له حکمتیار سره د ځمکې او کور د قرارداد غځولو ته چمتو دي، خو حکمتیار ۵۰ کلن قرارداد غواړي. اوس طالبانو حکمتیار ته ددوشنبې ورځې د سهار تر اتو بجو وخت ورکړی چې یا دوه کلن قرارداد ومني او یا کور او ځمکه تخلیه کړي”.
سرچینه وایي، دفاع وزارت د خپلې ځمکې په تړاو اعتراض نه لري خو د طالبانو یوه ډله غواړي دولتي ځمکه پر نوموړي د فشار په توګه وکاروي، ځکه د طالبانو د حکومت رهبري د حکمتیار له دریځونو راضي نه ده.
په ورته وخت کې د حزب اسلامي سکرتریت کوبها نیوز ته وویل چې حکمتيار لا په خپل کور دارالامان کې دی او دده د د فتر د محاصرې خبره حقیقت نه لري. سرچینه وایي، “د عدلیې وزارت له لوري نن یکشنبه یو پلاوی راغلی و او د دفترو نو د تخلیې غوښتنه يې کړې. حکمتيار ددوی غوښتنه منلې او خپلو کسانو ته يې امر کړی چې دفترونه تخلیه کړي. اوسمهال د دفترونو د تخلیې او انتقال پروسه روانه ده.”
ویل کیږي حکمتیار ته ویل شوي چې تر بل تصمیم پورې په وزیر اکبرخان کې ځای پرځای شي.
ګلبدین حکمتیار د کابل له سقوط وروسته د مولوي نصرالله منصور له ډلې څخه چې د طالبانو یوه ځواکمنه ډله بلل کیږي، شکایت لري.
یوې باوري سرچینې کوبها نیوز ته وویل، چې حکمتیار په کابل کې د پاکستان سفیر ته له فاتح ځواک، د مولوي سیف الرحمن منصور د کورنۍ له غړو ملا عبداللطیف منصور ، د کابل ولایت له پخواني والي مولوي عبدالرحمن منصور او د طالبانو د استخباراتو لومړي مرستیال ملا تاج میر جواد نه په تکرار شکایتونه کړي چې دوی ته ستونزې جوړوي.
حکمتیار د اسلامي حرکت ګوند د یوې مخکښې څېرې مولوي نصرالله منصور په وژلو تورن دی، چې د ډلې غړي یې اوس د طالبانو د حکومت په مهمو پوسټونو کار کوي.