کابل(۷ وری ۱۴۰۳ کوبها نیوز)- طالبانو د خپل روحاني مشر ملا هبته الله اخندزاده وروستی پیغام له رسمي پاڼو لرې کړی.
د ښځو او له لویدیز سره د مقابلې په تړاو دغه پیغام د طالبانو تر کنټرول لاندې ملي ټلویزیون، باختر خبري اژانس، ددې ډلې د ویاند ذبیح الله مجاهد ، د ملي ټلویزیون د مرستیال او نورو اړوندو رسمي رسنیو پر پاڼو خپور شوی و، خو اوس دغه پیغام له اړوندو پاڼو لرې شوی.
طالبانو ته نږدې یوې سرچینې کوبها نیوز ته وویل چې دغه پیغام څه وخت وړاندې چمتو شوی و، خو د .طالبانو یو شمېر مشران او د سیاسي کمیسیون غړي یې د خپرېدو پلوي نه وو. سرچینه وایي، ” دغه پیغام د فشار له امله خپور شو”.
ملا هبته الله اخندزاده په خپل وروستي غږیز پیغام کې وویل چې دوی د الله حدود نافذوي او لویدیز که هرڅو ووایي، چې دا د ښځو د حقوقو پایماله کېدل دي خو دوی به د زنا حد تطبیقوي او په عام محضر کې به یې په ډبرو ولي او یا به ښځې په دورو وهي. هغه دغه راز ویلي چې ط.البان شل کاله نور هم جګړې ته چمتو دي.
د طالبانو د مشر دغه پیغام په کوردننه د ګڼو خلکو او سیاستوالو غبرګونونه را وپارول.
ملګرو ملتونو د ط.البانو د مشر هبة الله اخندزاده دغه څرګندونې نهیلي کوونکې وبللې. د دغه سازمان د سرمنشي مرستیال ویاند فرحان حق نن یوه خبري ناسته کې وویل چې دوی د ښځو په تړاو د طالبانو پر چلند خپلې اندېښنې شریکې کړې او د صادرو شویو فرمانونو د لغو کولو غوښتنه کوي.
طالبانو له خپلو رسمي پاڼو ددې پیغام د لرې کولو د علت په تړاو څه نه دي ویلي.