خوست، د فبروري ۱۳مه، (کوبهانیوز)- طالبانو د خوست ولایت په یو شمېر اوسنیو سرحدي سیمو کې د کندهار، غزني او وردګو ولایتونو اړوند طالبان ځای پرځای کړي.
ددغو طالبانو د ځای پرځای کېدو هدف، ظاهرا له قبایلي سیمو نه د داعش جنګیالیو د احتمالي نفوذ مخنیوی ښودل کیږي. دغه تغییرات د خوست د اوسني والي ملا بسم الله عبدالله له ګومارل کېدو وروسته رامنځته شوي دي.
طالبانو ته یوې نږدې سرچینې کوبها نیوز ته وویل، چې نوي طالبان د خوست ولایت د علیشیر، ځاځي میدان او ګوربزو ولسوالۍ په سرحدي امنیتي پوستو کې په دندو ګومارل شوي دي. سرچینه وایی«په هغو سیمو کې چې د ټي ټي پي جنګیالي نفوذ لري، دداعش د نفوذ له اړخه اندېښنه په ټیټه کچه کې ده، خو په نورو سیمو کې له ننګرهار نه تر کونړ او نورستان پورې طالبان دداعش پر وړاندې خورا حساس دي».
طالبانو پر ډیورنډ کرښه د لګول شوي اغزن تار ترڅنګ په ځینو سیمو کې خام سړک جوړ کړی چې په اسانۍ سره ګزمې وکړي او پر کرښه تګ او راتګ و څاري.
له شمالي وزیرستان سره پر ډیورنډ کرښه له دې وړاندې ډېری د حقاني شبکې جنګیالیو دنده ترسره کوله.
د طالبانو حکومت ظاهرا دداعش ډلې فعالیت د افغانستان امنیت ته جدي خطر نه بولي، خو دا اندېښنې شته چې په قبایلي سیمو کې یو شمېر پخوانۍ جنګیالۍ ډلې د پاکستان له امنیتي ادارو سره د ښو او نږدې اړیکو له امله د افغانستان پر لور نفوذ کولای شي.
د تېرې جنوري میاشتې په وروستیو کې د پاکستاني طالبانو پخواني ویاند احسان الله احسان له سنډې ګارډین هندۍ ورځپاڼې سره په یوه مرکه کې وویل چې اسلام اباد غواړي داعش ډله افغانستان ته ولېږدوي او د نیابتي ډلې په توګه یې وکاروي. احسان په دې مرکه کې د پاکستان پر استخباراتي ادارو تور ولګاوه چې دداعش قوماندانان په خپلو مېلمستونونو کې ساتي.
د ۲۰۲۳ کال په نومبر کې د پاکستان سرپرست لومړي وزیر انوارالحق کاکړ په یوه ټلویزیوني مرکه کې طالبانو ته خبرداری ورکړ، چې که د پاکستاني طالبانو فعالیتونه کنټرول نه کړي، پاکستان به یې ډېر ونه زغملای شي. کاکړ له جیونیوز سره په مرکه کې وویل: « که له موږ سره داسې خلک موجود وي لکه داعش یا ورته بله ډله چې له پاکستان نه ځي او په کابل، کندهار او جلال اباد کې ځانونه الوزوي، نو د طالبانو او افغانانو به څه غبرګون وي؟»
د افغانستان او پاکستان د چارو شنونکي په دې باور دي، چې د ټي ټي پي د کنټرول په برخه کې پر افغان طالبانو د پاکستان فشارونو پاموړ پایله نه ده ورکړې او ښايي اسلاام اباد پرکابل د فشار لپاره دداعش تر چتر لاندې نورې وسله والې ډلې راپورته کړي.
د طالبانو حکومت د افغانستان په پولو کې د پاکستاني او نورو بهرنیو جنګیالیو د حضور رپوټونه رد کړي دي.
د پاکستان د لوی درستیز سید عاصم منیر له ګومارل کېدو وروسته د طالبانو حکومت او پاکستان ترمنځ اړیکې ترینګلې دي.
دغه خبر د کوبها نیوز خبري ټیم تولید کړی او ایډیټورانو یې سمونچارې ترسره کړې