کابل (۲۳ کب ۱۴۰۲ کوبها نیوز) د پاکستان د بهرنیو چارو د وزیر په توګه د محمد اسحاق ډار د کار په لومړۍ ورځ د طالبانو د حکومت د بهرنیو چارو سرپرست وزیر امیر خان متقي هغه ته لیک ولیکه او په دغه لیک کې یې ډاډ ورکړی چې کابل د اسلام اباد له نوي حکومت سره په بېلابېلو برخو کې همکارۍ ته چمتو دی.
امیر خان متقي اسحاق ډار ته د ورور خطاب کړی او لیکلي یې دي: “افغانستان او پاکستان د تل په خبر د خپلو ورورگلویزو اړیکو لپاره لوی فرصتونه په لاس کې لري. د افغانستان اسلامي امارت چمتو دی چې له پاکستان سره دشته فرصتونو په برخه کې د ورورگلوی په فضا کې گډ کار ته دوام ورکړي”.
محمد اسحاق ډار تر دې وړاندې د شهباز شریف په ایتلافي حکومت کې د ۲۰۲۲ او ۲۰۲۳ کلونو ترمنځ د مالیې د وزیر په توګه کار کړی او د ده د وزارت پر مهال د افغانستان او پاکستان ترمنځ سوداګرۍ تر ټولو ډېرې ستونزې تجربه کړې او له هغه وخت راهیسې درې سوداګریز بندرونه غلام خان، سپین بولدک او تورخم څو ځلې د هغو لاریو پر مخ تړل شوي چې د دواړو هېوادونو سوداګریز توکي لېږدوي.
له بلې خوا، د پاکستان د مسلم لیګ (ن) او د پاکستان خلکو ګوند تر منځ د ایتلافي حکومت له جوړېدو سره سم، د طالبانو د حکومت مشرتابه له اسلام اباد سره د اړیکو د ټینګولو هڅې ګړندۍ کړې دي.
د همدغو هڅو په دوام د سه شنبې په ورځ کابل کې د پاکستان د سفارت شارژدافیر عبیدالرحمن نظاماني کندهار ته ولاړ او هلته یې د کندهار له والي ملا محمد شیرین سره وکتل او د طالبانو د مشرتابه له پیغام څخه وروسته کابل ته راستون شو. که څه هم تر اوسه څرګنده نه ده چې نظاماني په خپله خوښه یا د طالبانو د مشرتابه په بلنه کندهار ته سفر کړی او د طالبانو د مشرتابه له لوري ورته کوم پیغام رسېدلی، خو پاکستانۍ ډان ورځپاڼې لیکلي چې د دغه پیغام له ترلاسه کولو وروسته به د پاکستان شارژدافیر له کندهاره ډېر ژر اسلام اباد ته لاړ شي او دا پیغام به د پاکستان د نوي حکومت له مشرتابه سره شریک کړي.
تر دې وړاندې د کندهار والي ملا شیرین اخند چې د طالبانو روحاني مشر ملا هبت الله اخندزاده ته نږدې کس ګڼل کیږي، د جنورۍ په میاشت کې پاکستان ته سفر کړی و او له پاکستاني ملکي او پوځي چارواکو سره یې لیدلي وو، خو ظاهراً د پاکستان حکومت د همکارۍ له هغې ژمنې راضي نه شو، چې ده له ځان سره اسلام اباد ته وړې وه، ځکه په ملګرو ملتونو کې د پاکستان دایمي استازي منیر اکرم د امنیت شورا وروستۍ غونډې ته د پاکستاني طالبانو د نه کنټرول په تړاو له افغان طالبانو شکایت وکړ او له ملګرو ملتونو یې وغوښتل چې د تحریک طالبان پاکستان د بریدونو مخنیوي په برخه کې د طالبانو پر حکومت فشار راوړي.
د پاکستان د امنیت او شخړو د مطالعاتو انسټیټیوټ په خپل نوي راپور کې لیکلي چې یوازې د ۲۰۲۴ کال په فبرورۍ کې په پاکستان کې شاوخوا ۱۰۰ وسله وال بریدونه شوي چې د پوځیانو او ملکي وګړو په ګډون پکې ۸۷ کسان وژل شوي دي.
له اسلام اباد سره د اړیکو رغولو په تړاو د طالبانو د بهرنیو چارو د سرپرست وزیر تمه او په کندهار کې د دوی د مشرتابه هڅې په داسې حال کې دي چې د پاکستان د نوې کابینې جوړښت د دې ښکارندویي کوي چې د نوي حکومت منځمهاله ستراتیژي د پیسو نړیوال وجهي صندوق (IMF) غوښتنو ته د ځواب ویلو په موخه ددغه هیواد پر مالي او اقتصادي وضعیت متمرکزه ده او له همدې امله اسحاق ډار چې د مالیې په وزارت کې څو کلنه تجربه لري، د بهرنیو چارو وزیر او د یوه بانک رییس د مالیې وزیر په څوکۍ ټاکل شوي. خواجه محمد اصف چې د افغان طالبانو له پخوانیو ملاتړو او د هغوی د وروستیو سیاستونو منتقد و، د پاکستان د دفاع وزارت په څوکۍ پاتې دی.