کابل( ۱۴ غویي ۱۴۰۳ کوبهانیوز)— د طالبانو د ریاست الوزراء اقتصادي مرستیال د کابل سروبي د لتهبند سړک له ځینو برخو لېدنه کې اعلان وکړ،چې د دې لارې د جوړېدو چارې پیلوي.
په دې لېدنه کې د طالبانو د ټولګټو وزیر، د کابل او ننګرهار لپاره د طالبانو والیانو او د سکټوري وزارتونو تخنیکي ټیمونو برخه درلوده.
د طالبانو د ریاست الوزرا د اقتصادي مرستال د رسنیو دفتر د غویي ۱۴مه یوه اعلامیه کې ويلي چې د ټولګټو چارو وزارت د دې سړک د پاتې برخو د جوړېدو چارې پيلوي. په اعلامیه کې پر پروژه د کار د پيلېدو دقیقه نیټه نه ده ذکر شوې.
د لتهبند لویه لاره د کابل – جلال اباد لپاره د ماهیپر بدیل سړک بلل کېږي.
د دې سړک د جوړېدو چارې شاوخوا لس کاله دمخه د پخواني حکومت له خوا پيل شوې، خو وروسته يې کار نیمګړی پاتی شو.
د طالبانو حکومت له خوا د لتهبند سړک د جوړولو اعلان تر هغې وروسته دی چې، تېره اوونۍ د کابل- جلال اباد تر منځ لاره، په ماهیپر کې د غره ښوېدو له امله وتړل شوه.
د دې لارې يوه چلوونکي محمد انصارالله کوبهانیوز ته وويل، چې ورښتونو او سیلابونو د ماهیپر لار تر پخوا لا پسې خرابه کړې ده.
نوموړی وايي: “د ماهیپر لاره له خطرونو نه ډک ده، هره شېبه د غره ښویېدو امکان شته، که د لتهبند لاره جوړه نه شي سږکال به د ډېرو پېښو شاهدان یو.”
عبدالله حبیب چې وخت ناوخته له کابله ننګرهار ته سفر کوي، کوبهانیوز ته وويل چې دجلال اباد لویه لاره د هېواد په کچه له خطره ډک لاره ده.
هغه وويل: “د فوايدعامې وزارت د دې سړک نه بررسي نه کوي، موږ ګورو چې وروستیو کې د دې لارې په ډېرو برخو کې غر را ښوییږي. دا وزارت بايد لاس په کار شي.”
پر ماهیپر سربېره تېره اوونۍ د کابل -جلال اباد ترمنځ سړک د درونټې په سیمه کې هم غرښوېدنه شوې وه چې اتو کسانو ته پکې مرګ ژوبله واوښته.
کابل- جلال اباد چې د افغانستان د ختیځ زون څلور ولایتونه له کابل سره نښلوي د ټرانزیټ او مسافرو د تګ راتګ لپاره مهمه لاره بلل کېږي.
د ټولګټو وزارت د اټکل له مخې، هره میاشت پر دې لاره شاوخوا ۶۰ زره کسان تګ او راتګ کوي.