فیض اباد (کوبها نیوز)— له فراه وروسته بدخشان دویم ولایت دی چې عام خلک پکې د طالبانو خلاف لاریون ته راوځي.
په درایم ولسوالۍ کې لاریون کوونکو طالبان د خلکو د خصوصي حریم په ماتولو تورن کړل او د “مرګ پر اسلامي امارت” شعارونه یې ور کړل. لاریون کوونکو غوښتل د طالبانو په ډزو کې د یوه تن وژل شوي لاریون کوونکي جسد د ولسوالۍ پر لور د اعتراض په توګه یوسي، خو طالبانو یې مخه ونیوله.
ظاهرا دغه لاریونونه د بدخشان په درایم او ارګو ولسوالیو کې د کوکنارو د کښت له منځه وړو پر خلاف پیل شوي، چې یو وخت د طالبانو د جګړې او اکمال مهم مرکزونه ګڼل کېدل، خو د لاریون کوونکو له شعارونو ښکاري چې ددې سیمو خلک په خپلو سیمو کې د غیر بدخشاني طالبانو له حضور نه خوښ نه دي.
د بدخشان درایم، ارګو، یفتل، کوهستان، درواز، وردوج، یمګان، جرم او خاش هغه ولسوالۍ دي چې د طالبانو په لیکو کې ګڼ جنګیالي لري او د افغانستان په شمالي ولایتونو کې یې ددې ډلې په نفوذ او جګړو کې ټاکونکی رول درلود.
له فراه وروسته دا دویم ولایت دی چې کروندګر او عام خلک پکې د طالبانو خلاف مظاهرې کوي او د کوکنارو د کروندو له منځه وړو په تړاو ددې ډلې د مشر ملا هبت الله فرمان ننګوي.
د طالبانو د کورنیو چارو وزارت ویاند د شنبې په ورځ وویل چې د نشه یي توکو د کښت د ممنوعیت په تړاو د دوی د مشر فرمان څرګند دی، چې پولیس یې د تطبیق مکلفیت لري.
عبدالمتین قانع وایي، “په بدخشان کې چې د کوکنارو د کښت له منځه وړو پرمهال کومه پيښه رامنځ ته شوې، موږ یې په اړه د بدخشان ولایت له سیمه ییزو چارواکو سره په اړیکه کې یو او د کورنیو چارو وزارت هڅه کوي چې د خلکو په همکارۍ دغه ستونزه حل کړي”.
خو د درایم ولسوالۍ د قرلق کلي لاریون کوونکي چې دیوه وژل شوي کس جنازې ته را ټول شوي وو، وایي، طالبان د کوکنارو او چرسو بوټو د له منځه وړو په پلمه د خلکو کورونو ته ننوتلي او د ښځو پر عزت یې لاس پورته کړی.
د لاریون کوونکو په وینا، طالبانو په دې کلي کې د کوکنارو د کښتونو د تخریب پرمهال دهقانان او سپین ږیري ډبولي، یو کس یې وژلی او د یوې ښځې لاس یې ور مات کړی.
د طالبانو ریاست الوزرا ددې پېښې د څیړنې لپاره د ملي دفاع وزارت د ستر درستيز فصيح الدين فطرت په مشرۍ پلاوی ټاکلی چې د فرامینو او حکمونو د تعقیب او نظارت لوی رئيس شمس الدين شریعتي، د کورنیو چارو وزارت له نشه یي توکو سره د مبارزې معیین ملا عبدالحق، د استخباراتو د عمومي ریاست مرستیال ملا رحمت الله نجيب او د بدخشان د علماوو شورا رئيس مولوي عبدالمومن پکې شامل دي.