کوبها نیو( ۳۱ حمل ۱۴۰۳) د طالبانو پر حکومت د نړیوالو بندیزونو او محدودیتونو له زیاتېدو سره هممهال دې ډلې د خپلو حکومتي چارو د پرمخ بیولو لپاره له عامو خلکو، سوداګرو او دوکاندارانو څخه د ټکس او مالیې په را ټولولو تمرکز ډېر کړی دی.
طالبانو نه یوازې د برښنا بیل او دولتي خدماتو بیه لوړه کړې، بلکې له هټیوالو او سوداګرو څخه د صفایي کتابجې په نوم د پیسو ټولولو ترڅنګ، د صنفي جواز مالیه، د فعالیت د جواز مالیه، د لوحو ټکس او کلنۍ یو فیصد مالیه هم ټولوي.
د کابل ښار یوه هټیوال د نوم نه ښودلو په شرط کوبها نیوز ته وویل چې طالبان په بیلابیلو نومونو له دوی څخه ملا ماتوونکې مالیه اخلي.
هغه وایی: «له موږ څخه پنځه ډوله مالیه اخېستل کیږي. د صفایي کتابچې په نوم، د صنفي جواز، د فعالیت جواز، د کال یو فیصد مالیه د لوحو ټکس او داسې نور، موږ نور له دې وضعیت څخه تنګ راغلي یو، مجبور یو خپل کار وبار بند کړو».
که څه هم د طالبانو مشر د یو فرمان په اساس د لوحو مالیه معاف کړې خو ویل کیږي چې دغه فرمان نه دی تطبیق شوی او د پخوا په څېر د لوحو مالیه هم اخېستل کیږي.
یوه بل افغان سوداګر کوبها نیوز ته وویل چې په ډېرې علاقمندۍ یې کار وبار پیل کړی، خو د دولت له خوا د لوړې مالیې له امله ښایي خپل کار ته دوام ورنه شي کړای.
« حکومد باید سوداګرو ته د کار او فعالیت ښه فرصتونه رامنځ ته کړي، له هغوی باید ملاتړ وکړي، د کار وبار د ودې لپاره یې لارې چارې ولټوي، خو متاسفانه زموږ حکومت د خلکو او سوداګرو په مالیې ولاړ دی، سوداګر ټوله ورځ د حکومت لپاره کار کوي ځکه ایله یې مالیه ور پوره کړو».
بل لور ته د کابل ښاروالۍ او د طالبانو د سوداګرۍ وزارت مسوولینو په وار وار ټینګار کړی چې دوی د قانون مطابق له سوداګرو او هټیوالو مالیه را غونډوي او د پخوا په پرتله اوس افغانستان کې د سوداګرۍ لپاره شرایط مناسب دي.