کابل ( ۷ وری ۱۴۰۳ کوبها نیوز ) : د ط.البانو حکومت د بهرنیو چارو وزارت د یوې اعلامیې په خپرولو سره په خیبرپښتونخوا کې پر چینايي انجنیرانو نننی برید د خواشینۍ وړ بللی او له پیجینګ او اسلام اباد سره یې خپله خواخوږي څرګنده کړېده.
نن غرمه مهال د خیبرپښتونخوا په شانګله سیمه کې د موټربم چاودنې په دې پېښه کې پینځه چینايي انجنیران او د هغوی یو پاکستانی چلوونکی وژل شوي دي.
د دې برید هدف ظاهرا چینايي انجنیران ښودل کېږي، خو پاکستاني رسنیو دې وژل شوو انجنیرانو ته یوازې د چینايي وګړو اصطلاح کارولې ده.
د ط.البانو حکومت د بهرنیو چارو وزارت په خبرپاڼه کې یادې پېښې ته په اشارې ویل شوي، “داسې بریدونه د سیمهيیزې همکارۍ د کمزوري کولو په هدف ترسره کېږي، د سیمې هېوادونه باید د مثبتو سیمهییزو همکاریو رامنځته کولو لپاره د ورته بریدونو مخه ونیسي.”
په پاکستان کې د چین سفارت د اعلامیې په خپرولو سره ویلي چې برید د داسو بند پر چینایي انجنیرانو شوی.
په اعلامیه کې ویل شوي چې د چین سفارت له برید سملاسي وروسته د پاکستان له حکومت سره پر یوه بیړني امنیتی پلان خبرې کړې دي.
د چین سفارت په پاکستان کې خپلو وګړو ته لارښوونه کړې چې د ممکنه امنیتي پیښو پر وړاندې لازم اقدامات په پام کې ونیسي.
اخوا د پاکستاني طالبانو ویاند محمود خراساني له پاکستانی رسنیو سره په خبرو کې د دې برید مسولیت رد کړی.
تراوسه کومې وسلهوالې ډلې د دې برید مسوولیت نه دی اخیستی، خو دا په لنډ وخت کې پر چینایي اهدافو او د هغوی د فعالیت په ساحه کې درېیم برید دی چې ترسره کیږي.
د داعش پخواني مبلغ عبدالرحیم مسلم دوست چې اوس د طالبانو د حکومت ملاتړ کوي، پر خپله ایکسپاڼه دې برید ته په غبرګون کې ویلي چې پر چینایانو دغه برید د پاکستان د فشار هڅه ده، چې غواړي چین له افغانستان سره د واخان کوریډور، ټرانزیټ، پانګونې او سیاسي تعامل نه را وګرځوي.
په ورته وخت کې د پاکستان د پوځ د عامه اړیکو ادارې (ISPR) په ګوادر، تربت او بشام کې د وسله والو وروستي بریدونه په کلکه غندلي او دا یې د پاکستان د داخلي امنیت د خرابولو لپاره د کرکې وړ هڅې بللې دي.
یادې ادارې په خپله اعلامیه کې ویلي، چې په ګوادر او تربت كې د جنګالیو بریدونه په لومړنیو شیبو کې شنډ شوي خو په بشام كې د چینایانو پر لېږدوونکي موټر برید په نتيجه كې د پنځو چينایي وګړو په ګډون شپږ كسان مړه شوي دي. اعلامیه وایي، چې په پاکستان کې د ترهګرۍ په ملاتړ بهرني عناصر شریک دي.