کابل (کوبها نیوز) – د طالبانو د حکومت د مخابراتو او معلوماتي ټکنالوجۍ سرپرست، نجیب الله حقاني وايي، دې وزارت یوه پالیسي جوړه کړې چې له مخې به یې په افغانستان کې د فیسبوک کارول محدود شي او که د دوی مشرتابه موافقه وکړي، دغه ټولنیزه شبکه به په بشپړه توګه بنده کړي.
د طالبانو د حکومت د مخابراتو سرپرست وزیر له طلوع نیوز سره په ځانګړې مرکه کې د دې پالیسی د جوړولو لامل د ځوانانو له خوا د فیسبوک ډېر کارول بولي او وايي چې په دې شبکه کې د دوی بوختیا د دې لامل شوې چې له زده کړو بې برخې پاتې شي.
د فیسبوک د محدودولو دغه اقدام د ځوانانو د تعلیم په پلمه په داسې حال کې کیږي، چې له شپږم ټولګي څخه پورته د نجونو په مخ د ښوونځیو له تړلو نږدې درې کاله تېرېږي او شپږ میاشتې کېږي چې طالبانو د نجونو پوهنتونونه په بشپړه توګه تړلي دي.
پر رسنیو د طالبانو له بندیزونو او محدودیتونو سره هممهاله، په افغانستان کې ډېرو خلکو په ځانګړې توګه ځوانانو د ازادو معلوماتو او خبري پېښو د تعقیب لپاره ټولنیزو شبکو، په ځانګړې توګه فیسبوک ته مخه کړې ده.
د میټا شرکت اړوند ټولنیزو شبکو فیسبوک، انسټاګرام او واټس اپ د ۲۰۲۲ کال په جون میاشت کې د طالبانو د حکومت د چارواکو او جنګیالیو پر تبلیغاتو او اکاونټونو بندیز ولګاوه. میټا شرکت په خپله اعلاميه کې د دې کار لامل له دغو شبکو څخه په استفادې د طالبانو د تبليغاتو مخنيوى بللى او د ملي تلويزيون په ګډون، د طالبانو تر کنټرول لاندې د ټولو دولتي ادارو او رسنيو حسابونه يې بند کړل.
ددې اقدام په غبرګون کې د طالبانو مشر سترې محکمې ته په یوه حکم کې امر وکړ چې د مخابراتو او معلوماتي ټکنالوجۍ له وزارت سره په همغږۍ، د میټا شرکت اړوند ټولنیزو شبکو کارول وڅېړي او په افغانستان کې یې د فعالیتونو په اړه پرېکړه وکړي.
د طالبانو د فیسبوک بندولو پالیسي په داسې حال کې نهایي کیږي، چې دې ډلې خپله ټوله توجه اوس اېکس/ټویټر او نورو ټولنیزو شبکو ته اړولې ده.