کابل (کوبها نیوز)- د ط.البانو د لوړو زده کړو ، فرهنګ او پوهنې وزارتونه په پوهنتونونو او لیسو کې پر زده کوونکو د امارت پېژندنې مضمون لولي او ازموینې ترې اخلي.
دغه ډول ازموینې په تېرو شپږو میاشتو کې د میدان وردګو، پکتیا، خوست، بامیان، تخار، سرپل، بغلان، بلخ، دایکندي په شمول د افغانستان په ګڼو ولایتونو کې ترسره شوې دي.
د” امارت پېژندنې”په دغه کتاب کې د امارت د پېژندګلوۍ، د امارتي نظام د رهبرۍ، مشرانو، د ط.البانو د غورځنګ پیل، اهدافو، تاریخ او نورو اړوندو مسایلو په تړاو معلومات او بحثونه راغونډ شوي چې هدف یې محصلانو او زده کوونکو ته د امـ.ـارتي نظام ور پېژندل او د امـ.ارت خلاف د تبلیغاتو مخنیوی دي.
د لوړو زده کړو او پوهنې وزارتونو ددې مضمون لپاره ځانګړې ازموینې تنظیم کړې چې د پوهنتونونو او لیسو زده کوونکي او ځوانان پکې برخه اخلي او ممتازو بریالیو کسانو ته ډالۍ ور کوي.
د چارشنبې په ورځ ورته یوه ازموینه په بلخ پوهنتون کې واخستل شوه چې شاوخوا ۵۰۰ محصلانو او ځوانانو پکې ګډون کړی و.
د ط.البانو د لوړو زده کړو علمي معیین لطف الله خیرخوا چې په دې غونډه کې یې ګډون کړی و، وویل چې په جمهوري نظام کې ‘ځوانان له خپل فرهنګ نه لرې ساتل شوي وو’ او دوی غواړي ځوانان له خپل تاریخ او فرهنګ سره وصل وساتي.
“ موږ باید دې ته متوجه وو چې دلته نه د تاریخ خلا موجوده ده، نه د فرهنګ او نه د ارزښتونو خلاء”.
عزت الله چې په پکتیا کې یې په دغسې یوه ازموینه کې برخه اخستې وایي، چې ډېر زده کوونکي او ځوانان د ازموینې د رقابتي او تشویقي اړخ له امله د امارت پېژندنې کتاب لوستلو ته هڅیږي.
هغه کوبها نیوز ته وویل: “زده کوونکو ته ۱۵۰ پوښتنې ورکول کیږي او له اول تر درېیم مقام پورې یوه برخه ده چې د کمپیوټر په څېر ښې جایزې ورکول کیږي، خو فکر کوم تر ۱۵ نومره پورې جایزې ورکول کیږي”.
دغه ازموینې په داسې حال کې اخستل کیږي چې د ط.لبانو حکومت د ښوونځیو او پوهنتونونو په تدریسي نصاب کې یو لړ تغییرات راوستي او په دې وروستیو کې یې پر هغو کتابونو بندیز لګولی چې امارتي نظام یې نقد کړی او یا د لویدیزو ارزښتونو د تبلیغ شک پرې کیږي.
شنبه, ۱۶ حمل, ۱۴۰۴
وروستي مطالب:
- اوتونبایوا: د دوحې په غونډه کې ګډون د طالبانو د رسمیت پیژندلو په معنی نه دي
- د پناه غوښتونکو نړیواله ورځ، افغان پناه غوښتونکي له اسیا تر اروپا د ایستلو له خطر سره مخ دي
- بنیت: د طالبانو له خوا د ښځو په وړاندې د سیستماتیک ظلم په وړاندې باید د انسانیت وجدان راویښ شي
- حاجیان د حج د مناسکو د بشپړولو لپاره مزدلفې ته رسېدلي دي
- جرمني د پنځو زرو افغان ښځو ملاتړ لپاره د سکالرشیپ پروګرام پیل کړ
- قزاقستان طالبان د ترهگرو ډلو له نوملړه و اېستل