کابل (کوبها نیوز) – د طالبانو حکومت د بهرنیو چارو سرپرست وزیر په کابل کې د افغانستان او قزاقستان د ګډ سوداګریز نندارتون د پرانستلو پر مهال ادعا وکړه چې د افغانستان د ګاوڼډیو هیوادو له ډلی، یو ګاونډی هېواد جنګیالی د داعش په واک کې ورکوي، دویم هېواد دغو جنګیالیو ته له خپلی خاوری د تېرېدو اجازه ورکړې او دریم هیواد هم داعش تمویلوي او د هغې لپاره عملیاتي پلان جوړوي.
خو امیر خان متقی د کوم مشخص هیواد نوم وانخیست او ونه ویل چې دا همکاري کله پیل شوې او د کومې موخې او هدف لپاره دغه درې هېوادونه د داعش وسله والو ملاتړ کوي.
تر دې وړاندې هم د طالبانو حکومت استخباراتو ادارې ته نږدې رسنیو له داعش سره د همکارۍ په تور د نیول شویو کسانو مرکې خپرې کړې وې.
د دغو مرکو په ترڅ کې اکثره نیول شویو کسانو ځانونه د تاجکستان اتباع معرفي کړل او ویې ویل چې په ترکیه کې د داعش ډلې له خوا استخدام شوي او د ایران له لارې افغانستان ته راوړل شوي او کله چې یې غوښتل د پوځي زده کړو لپاره پاکستان ته ولاړ شي، د ډیورنډ کرښې ته نژدی سیمو کې نیول شوي دي.
که څه هم د منځنۍ اسیا هېوادونه او روسیه له افغانستان سره د اقتصادي- سوداګریزو همکاریو د پراخولو هڅې کوي، خو د سیاسي- سوداګریزو پلاوو په ترکیب کې د دوی امنیتي چارواکو هم په وروستیو اونیو کې کابل ته سفرونه کړي او د امنیتي ګواښونو په اړه یې له طالبانو سره خبرې کړې دي.
د روسیې او منځنۍ اسیا هیوادونو ځینو رسنیو خبر ورکړی چې د افغانستان لپاره د روسیې د ځانګړي استازي ضمیر کابلوف د وروستي سفر هدف او له طالبانو سره د خبرو اصلي موضوع د داعش ډلې فعالیتونه وو.
روسي رسنیو لیکلي دي چې د منځنۍ اسیا په ځانګړې توګه د تاجکستان چارواکو د روسیې امنیتي چارواکو ته ویلي چې د طالبانو تر واک لاندی افغانستان او تاجکستان ترمنځ لازمه امنیتي همکاري نشته، له همدې امله داعش جنګیالي دې ته متوجه شوي دي.
تاجکستانی چارواکو روسیی ته ویلی چې په وروستیو کلونو کې منځنی اسیا هیوادونو یو شمیر وګړی په منځني ختیځ او په ځانګړې توګه سوریه کې د داعش له لوری جذب شوی او اوس دوی د افغان کډوالو په لیکو کې د ایران له لارې او بیا منځنۍ اسیا ته ځانونه رسوي.
خو د کابلوف د سفر په اړه د طالبانو د حکومت د بهرنیو او کورنیو چارو وزارتونو په اعلامیه کې د امنیتي خبرو او د داعش د مسلې په اړه څه نه دي ویل شوي.
په افغانستان کې واک ته د طالبانو له بیا راستنیدو سره، له تاجکستان پرته، د منځنۍ اسیا ټولو هېوادونو او روسیې د طالبانو له حکومت سره خپلې سیاسي او سوداګریزې اړیکې پراخې کړې.
که څه هم د تاجکستان چارواکي ادعا کوي چې واک ته د طالبانو په راتګ سره له افغانستان سره پر ګډه پوله د نشه يي موادو قاچاق او د جنګیالیو فعالیت زیات شوی، خو د منځنۍ اسیا د نورو هېوادونو برعکس تاجکستان لا هم د طالبانو له حکومت سره همکارۍ ته نه دی چمتو شوی.