مسکو (کوبهانیوز) – د روسیې د بهرنیو چارو وزیر سرګي لاوروف وايي، طالبان اوس مهال په افغانستان کې “حقیقي ځواک” دی او مسکو غواړي له دوی سره په اړیکو کې بدلون راولي.
د روسیې د بهرنیو چارو وزیر د «ممنوعه سازمانونو» له نوملړ څخه د طالبانو د نوم د ایستلو په اړه د هغه هېواد د عدلیې او بهرنیو چارو وزارتونو د وړاندیز په تړاو ویلي، چې مسکو له ۲۰۲۱ کال راهیسی د افغانستان وضعیت له نږدې څاري او دا واقعیت مني او پر افغانستان د طالبانو واکمني د “یوه واقعیت” په توګه مني.
په همدې حال کې د افغانستان لپاره د روسیې ځانګړي استازي، ضمیر کابلوف تاس خبري اژانس ته ویلي، چې طالبانو پر افغانستان له بیا واکمنی وروسته اوږد مزل وهلی، خو د ده په وینا اوس هم ځینې شرایط شته چې د مسکو له لوری د طالبانو حکومت د په رسمیت پیژندلو په وړاندی خڼډ دی.
که څه هم کابلوف د دغو خنډونو یادونه نه ده کړې، خو ټینګار کوي چې مسکو اړ دی ترڅو په یو ډول له طالبانو سره اړیکه کې وي: “د طالبانو نوم باید د ممنوعه سازمانونو له نوملړ څخه وایستل شي، ځکه له دې پرته د طالبانو په رسمیت پیژندل ناشوني دي. له همدې امله موږ له دې لیست څخه د دوی د نومونو د ایستلو په اړه کار کوو.”
دغه روسي ډيپلومات وايي، مسکو تر اوسه له طالبانو سره هېڅ ډول ډيپلوماټيکې راشه درشه نه لري. له همدې امله د تېرو کلونو پر خلاف، د طالبانو د واکمنۍ په درېیو کلونو کې مسکو هېڅکله هم طالبانو ته د افغانستان او روسیې د ډیپلوماتیکو اړیکو د ۱۰۵مې کلیزې په مناسبت د مبارکۍ پیغام نه دی لېږلی.
د روسیې د بهرنیو چارو او د عدلیې وزارتونو د روان کال په حمل میاشت کې پر یوه پلان کار پیل کړ، چې پر بنسـ به یې د «ممنوعه سازمانونو» له نوملړ څخه د طالبانو د ایستلو څرنګوالی ارزول کېږي او کریملین ته به یې وړاندیز کېږي.
په همدې حال کې د روسیې د بهرنیو چارو وزارت وايي، مسکو غواړي له افغانستان سره د سوداګریزو راکړو ورکړو د پراخولو ترڅنګ، له ترهګرۍ سره د مبارزې په برخه کې له طالبانو سره د همکارۍ لړۍ پیل کړي.
د روسیې د بهرنیو چارو په وزارت کې د اسیا د څانګې مشر، ضمیر کابلوف د دغه هېواد ۲۴ تلویزیون ته وویل، طالبانو په تېرو دوو کلونو کې د داعش د ځپلو لپاره، چې مسکو یې د یوې تروریستي ډلې په توګه پیژني، هېڅ راز هڅه نه ده سپمولي.
کابلوف وویل: “موږ نه یوازې په بېلابېلو اقتصادي برخو کې د همکارۍ هیله لرو، بلکې د قانون د حاکمیت په برخه کې هم غواړو، چې په افغانستان کې د قانون د پلي کوونکو ادارو ظرفیت لوړ کړو، څو وکولای شي د ترهګرو ډلو د ځپلو وړتیا ومومي.”
تېر کال په مسکو کې د کنسرت پر تالار له وسله وال برید وروسته، روسیې د سیمې له یو شمېر هېوادونو سره د ترهګرۍ، په ځانګړې توګه له داعش سره د مبارزې په اړه بحثونه وکړل، خو تر دې مهاله د مسکو او طالبانو ترمنځ د رسمي خبرو راپور نه دی ورکړل شوی.
په داسې حال کې چې د طالبانو حکومت د قزاقستان او ترکمنستان په همکارۍ سویلي اسیا ته د روسیې د میلیونونو ټنو نفتو د صادرولو په پلان کار کوي، د مسکو یوه پلاوي دوه اونۍ وړاندې کابل ته د سفر پر مهال د طالبانو د بهرنیو چارو سرپرست وزیر ته ډاډ ورکړ چې روسیه به په نړیواله غونډه کې د طالبانو د حکومت د دریځ ملاتړ وکړي.
دا په داسې حال کې ده، چې د ښځو له حقونو څخه د سرغړونې او د نجونو پر زده کړو د جدي محدودیتونو په ګډون، د یوه مشروع حکومت د رامنځته کولو لپاره د هڅو نه کولو له امله د طالبانو پر حکومت د نړیوالې ټولنې او افغانانو نیوکې پر خپل ځای دي او طالبانو هم په دې اړه کوم انعطاف نه دی ښودلی.