واشنګټن (کوبهانیوز) – د پاکستان بهرنیو چارو وزارت اعلان کړی چې د ترهګرۍ پر ضد د واشنګټن او اسلام اباد ترمنځ د ګډې مبارزې په اړه خبرې د جمعې په ورځ په ملګرو ملتونو کې د پاکستان د دایمي استازي د مرستیال او د امریکا د بهرنیو چارو وزارت له تروریزم سره د مبارزې د برخی مشر په ګډون په واشنګټن کې ترسره شوي.
د واشنګټن په غونډه کې دواړو لورو په سیمه کې د امنیتي ننګونو په ځانګړې توګه د تحریک طالبان پاکستان او داعش ډلې له ګواښ سره د مبارزې په برخه کې د پاکستان او امریکا ترمنځ پر همکارۍ خبرې کړې دي.
د پاکستان د بهرنیو چارو وزارت اعلامیه وايي، واشنګټن او اسلام اباد موافقه کړې چې په دغو دوو برخو کې به خپل منځي همغږي زیاتوي، خو په اعلامیه کې په افغانستان کې د داعش د ګواښونو یادونه نه ده شوې.
په دې وروستیو کې د طالبانو د بهرنیو چارو وزارت ادعا کړې وه چې د سیمې درې هېوادونه افغانستان ته د داعش جنګیالیو په تنظیم، تجهیز او ورتلو کې همکاری کوي.
د طالبانو حکومت د بهرنیو چارو وزارت ویاند هم په دې وروستیو کې ادعا کړې وه چې د داعش جنګیالي په پاکستان کې تنظیمیږي او د دوی پر ضد د داعش زیاتره بریدونه له پاکستانه کې همغږي کیږي.
په دوو مواردو کې د طالبانو د حکومت استخباراتو ادارې ته نږدې یوې رسنۍ د داعش ډلې د خراسان څانګې د نیول شویو جنګیالیو د اعترافونو ویډیوګانې خپرې کړې.
په یوه کې درې تنه تاجکستاني اتباع چې ادعا کېږي داعش وسله وال دي، وايي چې له ترکیې څخه افغانستان ته راوړل شوي او غوښتل یې پاکستان ته د پوځي زده کړو لپاره ولاړ شي، چې د ډیورند کرښېۍ په اوږدو کې د طالبانو له خوا ونیول شول.
په يوه بله ویډیو کې د دوو پاکستاني اتباعو اعتراف هم خپور شوى، چې وايي، له پوځي زده کړو وروسته د تروريستي فعاليتونو د ترسره کولو لپاره افغانستان ته راغلي وو او د طالبانو له خوا نيول شوي دي.
د پاکستان د بهرنیو چارو د وزارت ویاندې، زهرا بلوچ د جمعې په ورځ په یوه خبري غونډه کې دغه ادعاوې رد کړې.