پېښور (کوبها نیوز)- د پاکستان پوځ د ټي ټي پي او نورو پاکستاني طالبانو له ځانمرګو بریدونو د ځان ژغورنې په هدف د شمالي وزیرستان په مختلفو سیمو کې د امنیتي پوستو په شاوخوا کې خندقونه ایستلي.
په هغو انځورونو کې چې کوبهانیوز ترلاسه کړي، میر علې ته څېرمه په ایپي کلي کې د موټربم چاودنو د مخنیوي په هدف، اېستل شوې کندې لیدل کیږي.
د مارچ پر ۱۶مه د ګل بهادر د جیش فرسان محمد ډلې یوه ځانمرګي بریدګر په میرعلې کې له چاودېدونکو توکو ډک موټر له یوې پوځي پوستې سره وجنګاوه او ورپسې یې پر پوځي افسرانو ډزې وکړې چې په پایله کې یې لږ تر لږه اووه تنه پوځیان ووژل شول.
د پاکستان هوایي ځواک له دغه برید وروسته په خوست او پکتیکا کې د وزیرستاني کډوالو استوګنځایونه بمباري کړل چې په پایله کې یې اووه تنه ملکي کسان ووژل او د افغان طالبانو او د پاکستان د نوي حکومت ترمنځ رغېدونکې اړیکې یې بېرته ترینګلې کړې.
د شمالي وزیرستان اتحادالمجاهدین شورا چې مشري یې حافظ ګل بهادر کوي، په وزیرستان کې د پسرلنیو عملیاتو لپاره د النصره په نوم یوه نوې جنګي قطعه جوړه کړې ده.
سرچینې کوبها نیوز ته وویل چې ټاکل شوې تحریک طالبان پاکستان او د حافظ ګل بهادر اتحاد المجاهدین شورا په پاکستان کې خپل نوي پسرلني عملیات پیل کړي.
د ټي ټي پي او د شمالي وزیرستان اتحاد المجاهدین شورا د نویو پسرلنیو عملیاتو د پیلېدو رپوټونه په داسې وخت کې دي، چې ددې دواړو ډلو لیکې تر پخوا منظمې شوې او دداخلي اختلافاتو پر له منځه وړو او تشکیلاتي اصلاحاتو یې تمرکز ډېر کړی.
ټي ټي پي د روانې مارچ میاشتې په لومړیو کې د پخواني جماعت الاحرار ناراضه مشران بېرته له خپلو سازماني تشکیلاتو سره یوځای کړل او پر مهمو منصبونو یې وګومارل. په دې ګومارنو سره داسې اټکل دی چې دا ډله به له خپلې دودیزې جغرافیې وزیرستان نه بهر په نورو قبایلي سیمو، پېښور، سوات، دیر او د پاکستان نورو ښاري سیمو کې حضور پیاوړی کړي.
د پي ټي آی په مشرۍ په خیبر پښتونخوا کې واکمن ګوند سره له دې چې له طالبانو سره له تقابل ډډه کوي، خو له پوځ او امنیتي ادارو سره د اړیکو د ترینګلتیا له امله به د جنګیالیو د بریدونو پر وړاندې اسیب پذیر وي.
له ۲۰۰۸ کال نه تر ۲۰۱۳ کال پورې چې په دې ایالت کې د پښتون ملتپالې عوامي نشنل پارټۍ حکومت واکمن و، ددې ډلې ګڼ مشران د ټي ټي پي په مرګونو عملیاتو کې ووژل شول. په دې کلونو کې پر سیاست د پاکستان نفوذ لرونکی پوځ او څارګرې ادارې د متحده ایالاتو تر شدید فشار لاندې وو چې د بې پرې ټاکنو له لارې ډیموکراسۍ او منځلارو سیاسي ګوندونو ته لاره پرانیزي.
عوامي نشنل پارټۍ په خیبر پښتونخوا کې د امنیتي وضعیت په خرابیدو کې د ملامتۍ ګوته پوځ او امنیتي ادارو ته نیوله چې له ایالتي حکومت سره د سمسمکي په راوستلو کې مرسته نه کوي.
د پاکستان د پوځ لپاره دامهال د ټي ټي پي او نورو جنګیالیو له اړخه ګواښ له دې امله اندېښمنوونکی دی چې اسلام اباد د خپل خراب اقتصادي وضعیت له امله په قبایلي سیمو کې د پراخو عملیاتو جوګه نه دی او د متحده ایالاتو سخاوتمندانه مرستې هم پرې بندې شوې دي.