کابل( ۲۷ وری ۱۴۰۳ کوبهانیوز) – د طالبانو د کډوالو او بېرته راسېتنېدونکو چارو وزارت وايي چې، ۱۰۳ افغانان له پاکستان نه بېرته خپل هېواد ته راستانه شوي.
ياد وزارت په خپله خپره کړې خبرپاڼه کې ویلي: “۲۴ کورنۍ چې ۱۰۳تنه کېږي په جبري توګه له پاکستان څخه راستنې شوې دي”.
په خبرپاڼه کې ويل شوي، چې دا افغانان په تېرو دوو ورځو کې د تورخم فرضي کرښې له لارې افغانستان ته رالېږل شوي دي.
خبرپاڼه زیاتوي، چې دا کورنۍ په ننګرهار کې د کډوالو چارو رياست سره تر ثبت وروسته د ملګرو ملتونو د کډوالو عالي کمېشنرۍ او د کډوالو لپاره د نړیوال سازمان دفترونو ته د مرستې لپاره معرفي شوي دي.
د کډوالو په چارو کې د م م د عالي کمېشنرۍ د معلوماتو پر بنسټ، تېر کال له دې ادارې سره په پاکستان او ایران کې ۷،۷ میلیونه افغان کډوال ثبت وو خو په تېرو دوو کلونو کې يې یو نیم میلیون تنه بېرته افغانستان ته ستانه شوي دي.
د ملګرو ملتونو دې ادارې په همدې اوونۍ کې ويلي چې په پاکستان او ایران کې مېشتو افغان کډوالو سره مرستو لپاره ۶۲۰ میلیونه ډالرو ته اړتیا لري.
له دې سره هممهال ويل کېږي د پاکستان حکومت پرېکړه کړې چې روان میلادي کال د اپریل میاشتې په وروستیو کې له یاد هېواده د افغان کډوالو د ایستلو دویم پړاو پيل کړي. اټکل کېږي چې په دې پړاو کې ۶۶ زره هغه افغان کډوال افغانستان ته واستول شي چې د پاکستان حکومت ورته په ۲۰۱۷ او ۲۰۱۸ کلونو کې د کډوالی ځانګړي کارتونه ویشلي وو. د Afghan Citizen Cards په عنوان دا کارتونه پر هغو کډوالو ویشل شوي وو چې د ملګرو ملتونو د مهاجرت ادارې په مرسته بایومټریک او بیا د پاکستان پولیسو سره ثبت شوي دي.
پر دې سربېره د پاکستان نادرا ادارې ويلي چې تر دویم پړاو وروسته به د کډوالو ایستلو دريیم پړاو پيلېږي. دې اداري يادونه کړې ده چې، په درېيم پړاو کې به هغه یو عشاریه څلور میلیونه افغانان بیرته افغانستان ته ستانه کړل شي چې په ۲۰۰۶ کال کې شناخت کارتونه پرې وېشل شوي وو.
د رپوټونو له مخې پاکستان تېر کال تر نیم میلیون ډېر افغانان، افغانستان ته په جبري توګه ستانه کړي دي.