برلین (کوبها نیوز) د جرمني پولیسو دوه افغان وګړي له داعش سره د تړاو په تور نیولي.
د جرمني فدرالي پولیس وايي، د مارچ په پنځمه د تورینګن محکمې په رسمي توګه دوه افغان وګړي ابراهیم او رامین د داعش له خراسان څانګې سره په تړاو محکوم کړي او د سه شنبې په ورځ یې د مارچ په ۱۹مه په ګیرا ښار کې نیولي دي.
د جرمني د فدرالي پولیسو په اعلامیه کې راغلي چې دغو دوو کسانو تر دې مخکې هم په جرمونو کې لاس درلود او د ۲۰۲۳ کال په اګست میاشت کې د داعش ډلې د خراسان څانګې له خوا په رسمي توګه استخدام شوي.
ابراهیم او رامین تورن دي چې د دغې ډلې له خراسان څانګې سره له یوځای کېدو مخکې یې په جرمني کې د خیریه مرستو په توګه دوه زره یورو راټولې کړې او د سوریې په شمال کې یې د داعش بندیانو ته استولې دي.
د جرمني فدرالي پولیسو راپور ورکړی چې د داعش ډلې خراسان څانګې رامین نام ته دنده سپارلې چې د ۲۰۲۳ کال په پسرلي کې په سویډن کې د قران کریم د نسخو د سوځولو په غبرګون کې د یوه ترهګریز برید پلان جوړ کړي.
د پولیسو څېړنې ښيي چې ابراهیم له رامین سره په همکارۍ د سویډن د پارلمان په انګړ کې پر پولیسو او عامو خلکو د دغه برید پلان درلود، خو بریالي نه شول.
دغه دوه افغانان د سه شنبې په ورځ د تورینګن محکمې ته حاضر شول او د محکمې قاضي په رسمي ډول د محکمې له پریکړې خبر کړل.
ټاکل شوې د دوی د محاکمې بل پړاو په راتلونکو اونیو کې ترسره شي او د محکمې د پرېکړې له نهايي کېدو وروسته به په بند محکوم شي.
د داعش خراسان څانګه چې وخت ناوخت په اسيايي هېوادونو کې د يو شمېر ترهګريزو بريدونو مسووليت پر غاړه اخلي، ادعا کوي چې له ۲۰۲۰ کال راهيسې يې مرکز په افغانستان کې فعال دی.
دا په داسې حال کې ده چې د امریکا استخباراتي ادارو په دې وروستیو کې د دغه هېواد کانګرس ته ویلي چې د داعش خراسان څانګه غواړي د بهرنیو هېوادونو پر اهدافو او ګټو د بریدونو په ترسره کولو سره د طالبانو پر حکومت باور کم کړي او د طالبانو واکمني وننګوي.
تر دې مخکې د ملګرو ملتونو د امنیت شورا د بندیزونو د څارنې او تحلیلي کمېټې په راپور کې ویل شوي وو چې د داعش خراسان څانګه په افغانستان کې له څلورو تر شپږ زرو پورې جنګیالي لري او د افغانستان په ۱۳ ولایتونو کې فعالیت لري.
خو د طالبانو حکومت بیا ادعا کوي چې دغه ډله سخته ځپل شوې او د تروریستي فعالیتونو د ترسره کولو توان نه لري.