مسکو (کوبها نیوز) – د جمعې په ماښام وسله والو بریدګرو د کریملین له ماڼۍ څخه شل کیلومتره لرې د کروکاس سالون باندې برید وکړ، چیرې چې د راک کنسرت روان و.
برید کوونکي چې له مقاومت پرته تالار ته ننوتل، ۶۲ تماشاچیان یې ووژل او ۱۵۳ نور یې ټپیان کړل.
د روسیې د کورني امنیت وزارت رسنیو ته وویل، چې په وژل شویو کسانو کې پر ښځو او ماشومانو سربېره هغه ماشومان هم شامل دي، چې ټاکل شوې وه په کنسرت کې ننداره وړاندی کړي.
وزارت د برید کوونکو شمېر پنځه تنه یاد کړی او ویلي یې دي، چې برید د کلاشینکوف په وسیله ترسره شوی او د پېښې په ځای کې د مرمیو ترڅنګ لاسي بمونه هم موندل شوي دي.
داعش ډلې د یوه پیغام په خپرولو سره د دغه برید مسئولیت په غاړه واخیست او ادعا یې وکړه چې د دغې ډلې کسانو په دغه سالون کښې له سلو زیات کسان وژلی.
د سپینې ماڼۍ د امنیت شورا ویاند، جان کربي له پېښې څو ساعته وروسته خبریالانو ته وویل چې امریکا دوه اوونۍ وړاندې په مسکو کې خپلو اتباعو ته د ورته پېښې په اړه خبرداری ورکړی و.
په مسکو کې د امریکا سفارت د مارچ په اوومه نېټه په یوه خبرتیا کې امریکايي اتباعو ته خبرداری ورکړ وو چې د ګڼې ګوڼې په ځایونو، غونډو او کنسرتونو کې له ګډون څخه ډډه وکړي.
د جان کربي څرګندونې او په مسکو کې د امریکا د سفارت دوه اونۍ مخکی اعلامیی د جمعې په ورځ د امریکا او روسیې د حکومتونو د ویاندانو ترمنځ د لفظی بریدونو سبب شوه.
د روسیې د بهرنیو چارو وزارت ویاندې ماریا زاخاروفا ویلي، که امریکا داسې معلومات ولري، نو باید له مسکو سره د دې پېښې د عاملینو په اړه شریک کړي، خو جان کربي خبریالانو ته وویل، امریکا یوازې په مسکو کې له یوه ګواښه خبر وه، او بس.
په مسکو کې د جمعې د ماښام برید د نړۍ د ګڼو هېوادونو سخت غبرګونونه راوپارول او د ملګرو ملتونو د عمومي منشي، اروپايي هېوادونو په ګډون د نړۍ ډېرو هېوادونو له روسیې سره خپله خواخوږي څرګنده کړه.
د طالبانو د حکومت د بهرنیو چارو وزارت په یوه اعلامیه کې په مسکو کې د کنسرت پر تالار د برید په غندلو سره لیکلي دي: “داعش په افغانستان او سیمې هیوادونو کې پر ملکي وګړو په بریدونو سره څرګنده کړه چې د استخباراتی ادارو د لاس وسیله ده. د سیمې هېوادونه باید د هغو کړنو پر وړاندې ودرېږي چې د سیمې د بې ثباته کولو په هدف ترسره کیږی.”
خو د طالبانو د بهرنیو چارو وزارت په اعلامیه کې د هغو استخباراتي ادارو یادونه نه ده شوې چې د داعش ملاتړ کوي.
داعش ډلې په خپله اعلامیه کې دا نه دي ویلي چې برید کوونکي څنګه او په کومه وسیله مسکو ته رسېدلي، خو د افغانستان د پخواني ولسمشر مرستیال، امرالله صالح له دې برید یو ساعت وروسته پر ایکس پاڼه ولیکل چې: “دا برید د داعش له بریدونو سره ډېر ورته والی لري. دا برید په حیرانونکي ډول هغو بریدونو ته ورته دی چې طالبانو په تېرو دوو لسیزو کې زموږ په ښارونو کې تر سره کړي، داسې ښکاري چې د طالبانو د وحشت او د داعش د خراسان څانګې یوه کاپي ده.”
تېره اوونۍ دوه ساعته مخکې له هغی چې د امریکا سفارت په مسکو کې خپلو اتباعو ته خبرداری ورکړ، د روسیې د کورنی امنیت وزارت (FSB)، اعلان وکړ چې د مسکو په څنډه کې د عیسویانو پر یوې کنیسې د برید مخنیوی یې کړی.
د رویټرز په وینا، په دغه عبادت ځای کې برید د داعش د خراسان څانګې لخوا پلان شوی وو، چې تر ډېره په افغانستان او د سیمې په هېوادونو کې فعاله ده.