پېښور ( کوبها نیوز)- د پاکستان ملي شورا ته یوه نوې لایحه وړاندې شوې چې په سیمه کې له بودایي مذهبه هیوادونو سره د پاکستان د نښلولو لپاره د “ګندهارا دهلیز” رامینځته کولو غوښتنه کوي.
پښتونخوا عوامي ملي ګوند او یو شمېر پښتنو ملتپالو ددې لایحې غندنه کړې او دا یې د پښتونخوا او پښتنو د تاریخ، فرهنګ او مالي سرچینو د غصب کولو او حاشیې ته بیولو هڅه ګڼلې ده.
دا لایحه د سند ایالت اړوند وکیل ډاکټر رمیش کمار وانکواني له خوا وړاندې شوې ده. په دې وړاندیز شوې لایحه کې ویل شوي، “د دې قانون موخه دا ده چې د حکومت د ټولو څانګو او شریکانو تر منځ د ګډو تګلارو هڅول دي، چې پاکستان د توریزم په ترټولو غوره ځای او د ګندهارا ګرځندوی په نړیوال مرکز بدل کړي.”
ددې لایحې له مخې، د دهلېز مشر به د لومړي وزیر له خوا منصوب کیږي چې مشري به یې کوي او د دهلیز مرکزي دفتر به په اسلام اباد کې وي.
ډاکټر رمیش وانکواني ددې لایحې د وړاندې کولو پرمهال وویل چې، “د ګندهارا دهليز جوړول به له بودايي نړۍ سره د پاکستان د اتصال برخه کې د لوبې تغییر وي.” هغه ټينګار وکړ چې د نړيوالو ګرځندویانو منظم راتګ به د پاکستان اقتصاد ته وده ورکړي او له اسيايي هېوادونو سره به یې ډپلوماتیکې اړيکې پياوړې شي.
د عوامي نېشنل ګوند غړې مېرمن سمر هارون بلور وایي، په پاکستان کې د ګندهارا تمدن تر ۹۰ سلنه زیات اثار په پښتونخوا کې دي او دا لایحه په پښتونخوا کې د ګندهارا د تمدن د اثارو د غصبولو دسیسه ده.
مېرمن بلور وایي، “که لرغوني اثار په پښتونخوا کې وي، د پښتونخوا ایالت یې په اړه د قانون جوړولو واک لري. د ګندهارا تمدن او اثار د پښتونخوا په عایداتي سرچینو کې مهم رول لوبوي”.
ددغه ګوند د فرهنګ د برخې مسوول خادم حسین وایي، چې ګندهارا کولتوري قانون او اوس د “ګندهارا دهلیز” لایحه د پښتونخوا پر هویت اتوم بم او د پښتونخوا د منابعو د استثمار او د استعماري پراختیا غوښتنې هڅې دي.
هغه وایي، “د پښتونخوا د تاریخ په هره پاڼه کې د ګندهارا تمدن نښې دي. د ګندهارا تمدن او تاریخ د پښتونخوا ملکیت دی. دګندهارا دهلیز لایحه باید مرکز ژر تر ژره بیرته واخلي”.
پاکستان حکومت د ۲۰۲۳ کال جولای کې د ګندهارا تمدن او د بودايي میراث د بیا ژوندي کولو پر موضوع درې ورځنی سمپوزیم جوړ کړی و چې د چین، نیپال، ټایلنډ، کمبوډیا، جنوبي کوریا او نورو هېوادونو له ۳۰ ډېرو بودا مشرانو او راهبانو پکې ګډون کړی و.