پېښور(د غويي لومړۍ ۱۴۰۳ کوبهانیوز): د خیبر پښتونخوا په بېلابېلو سیمو کې د سختو سیلابونو له امله د تلفاتو شمېر ۷۰ ته لوړ شو، ۶۷ نور کسان ټپيان شوي دي.
په مړو شویو کسانو کې د ۲۵ ماشومانو په ګډون یو شمېر مېرمنې هم شاملې دي.
د خیبر پښتونخوا د طبیعي پېښو پر وړاندې د چمتووالي اداره (پي ډي ایم ای) وايي، دا سېلابونه د روانې ميلادي میاشتې له دوولسمې نېټې پيل شوي او ډېری په دیر، چترال، سوات، باجوړ، شانګله، مانسهره، مهمند، ملاکنډ، ټانک، مردان، چارسده، بونیر، هنګو او د پېښور په بېلابېلو سیمو کې راوتلي دي.
ځايي سرچینو تایید کړې چې په دې سېلابونو کې د استوګنې نږدې درې زره کورونه راپرېوتي او په زرګونو جریبه کرنیزه ځمکه اوبو وړې ده.
د خیبر پښتوخوا د هواپيژندنې ادارې وړاندوینه کړې ده چې دغلته به د اپريل تر ۲۱مې نېټې پورې په وقفهيي توګه ورښتونه وورېږي.
په ورته مهال د بلوچستان په چمن کې د مرکزي روغتون یوه ډاکټر، عبدالرشید نصیر رسنيو ته ويلي چې، له بېلابېلو سیمو څخه یو شمېر ټپي کسان د درمنلې لپاره ور وړل شوي دي. د نصیر په وينا په ځینو سیمو کې د سختو سیلابونو د بهېدو له امله د یو شمېر کسانو د نادرکه کېدو رپوټونه شته دي.
ځايي خلکو په دې سېلابونو کې زیانمنو شویو کورنیو ته د مرستو رسولو غوښتنه کړې ده.
د محمدبلال په نوم یوه ځايي اوسېدونکي سیمهييزو رسنيو ته ويلي، چې په دې سیلابونو کې یو شمېر کورنۍ بېځایه شوې دي او بېړنيو مرسته ته اړتیا لري.
د خیبر پښتوخوا د اعلی وزیر دفتر په يوه خبرپاڼه کې ويلي، چې د سېلابونو په پېښو کې د مړو شویو له کورنیو سره يې د مرسته لپاره ۹۰ میلیونه روپۍ بیلې کړې دي.