کندهار (کوبها نیوز)- د پنجشنبې په ورځ سهار اته بجې او دیرش دقیقی مشتریان د کندهار ښار په لومړۍ ناحیه کې د کابل بانک د دفتر مخې ته له بانک څخه د پیسو اخیستو په موخه کتار کې ولاړ وو، چې یوه ځانمرګي بریدګر یې په منځ کې په ځان پورې تړلي چاودېدونکي توکي وچول.
ځايي خبريالانو ته تر اوسه اجازه نه ده ورکړل شوی چې د پېښې ځای ته ولاړ شي او راپور چمتو کړي، خو د طالبانو د حکومت د امنيې قوماندانۍ وياند اسدالله جمشيد له پېښې څو ساعته وروسته رسنيو ته په يوه استول شوی ويډيويي پيغام د دریو کسانو د وژل کېدو او دوولس تنو نورو د ټپي کېدو پخلی وکړ.
خو له میرویس روغتون نه یوې باوري سرچینې کوبها نیوز ته وویل، چې د کندهار ښار له پېښې څخه ۲۱ مړي او تر ۵۳ ټپیان دغه روغتون ته وروړل شوي، چې یو شمېر ټپیان له درملنې وروسته رخصت شوي او یو شمېر جدي ټپیان تر درملنې لاندې دي.
تر اوسه کومې ډلې د دغه برید مسوولیت په غاړه نه دی اخیستی، خو د طالبانو حکومت کورنیو چارو وزارت په اعلامیه کې د قربانیانو د شمېر له ذکر کولو پرته دغه ځانمرګی برید «خوارجو» ته منسوب کړی دی.
د طالبانو د حکومت چارواکي اکثراْ داعش ډله د خوارجو په نوم یادوي.
طالبانو ته یوې نږدې سرچینې کوبها نیوز ته وویل، چې په دې وروستیو کې په کندهار کې د طالبانو مشرتابه او امنیتي ارګانونو داسې اطلاعات ترلاسه کړي وو چې ددغه ولایت امنیت ته ګواښونه متوجه دي. دوه ورځې وړاندې د کندهار والي ولایتي چارواکو او امنیتي ادارو ته لارښوونه کړی وه چې د دغه ولایت د امنیت د ټینګښت لپاره هڅې لا ګړندۍ کړي.
په همدې حال کې په کندهار کې د پنجشنبې ورځې پېښه له جدي غبرګونونو سره مخ شوې ده.
په دوحه کې میشت د افغانستان لپاره د امریکا د سفارت شارژدافیرې پر خپل ایکسپاڼه لیکلي چې د کندهار په ګډون په افغانستان کې پر ملکي وګړو بریدونه د غندنې وړ دي او د نورو ملتونو په څېر افغانان هم حق لري چې په سوله کې ژوند وکړي.
د افغانستان پخواني جمهور رییس، حامد کرزي په یوه پیغام کې دغه ځانمرګی برید غیر اسلامي او بشري ضد عمل بللی.
د مصالحی عالی شورا پخواني رییس عبدالله عبدالله په خپل ایکس پاڼه لیکلي چې د روژې په مبارکه میاشت کې پر ملکي وګړو برید جنګي جنایت او له ټولو اصولو او قوانینو سرغړونه ده.
په کندهار کې د پنجشنبې د ورځې ځانمرګى بريد په تېرو دوو کلونو کې دا ډول لومړى بريد دی چې د ځايي اوسېدونکو په وينا، په يوه خورا امنیتي سيمه کې ترسره شو.