پېښور(کوبهانیوز)- چینایي کمپنیو په خیبر پښتونخوا کې د بندونو پروژو کې بوخت زرګونه کسان په کور کښېنول.
دې کمپنیو پر داسو، تربیلا او ديامير بهاشا بندونو کار ځنډولی او دا امکان شته چې په خیبر پښتونخوا کې پر مهمند بند هم کار بند کړي.
په دیامیر بهاشا بند کې ۵۰۰ بوختو کسانو ته چینایي کمپنۍ لارښوونه کړې چې تر راتلونکي حکم پورې په کور پاتې شي.
د تېرې سه شنبې په ورځ په بشام کې د قراقرم پر لویه لار له چاودیدونکو توکو ډک یوه موټر د چینایي انجنیرانو له موټر سره ټکر وکړ چې له امله یې پنځه چینایي انجینران چې په داسو بند کې یې کار کاوه، ووژل شول.
د داسو پروژې یوه چارواکي جیو نیوز ته وویل چې چینايي شرکت د داسو بند کار بند کړی او ځایي کارکوونکو ته یې په کور د پاتې کیدو سپارښتنه کړې ده.
د خیبر پښتونخوا په بر کوهستان ولسوالۍ کې د ۴۳۲۰ میګاواټه په داسو بند باندې ۷۴۱ چینایان او ۶۰۰۰ ځايي خلک کار کوي.
د دیامیر بهاشا بند یوه مسوول نزاکت حسین په وینا، چینایی شرکت د بند کار بند کړی. هغه وایي، چې د بند په جوړولو کې شاوخوا ٥٠٠ چينايان او شپږ زره ځايي خلک په کار بوخت وو. هغه هيله څرګنده کړه چې په څو ورځو کې به د چينایي کارګرانو د راستنېدو په نتيجه کې وضعيت عادي حالت ته راشي.
د دیامیر بهاشا بند کې د هایدرو پاور تولید له لارې د ۴۸۰۰ میګاواټه بریښنا تولید باندې کار کیږي.
په ورته وخت کې د مهمند بند مسوول مشال راډیو ته ویلي، چې په دې بند کې ۲۵۰ چینایان کار کوي او دوی کار نه دی بند کړی. خو دغلته بوخت یو شمېر کارکوونکي وایي، چې که د چینایي انجنیرانو او کارکوونکو د امنیت مساله حل نه شي، ښایي پر دغه بند هم کار وځنډیږي.
دا په داسې حال کې ده چې د جمعې په ورځ د پاکستان د کورنیو چارو فدرالي وزیر محسن نقوي په اسلام اباد کې د چین سفارت کې د چینایي انجنیرانو د امنیت په تړاو د خپلو اقداماتو د رپوټ ورکولو پرمهال وویل چې د شانګلې بريد اصلي عاملان به په هر صورت کې محکمې ته راوستل شي.